काठमाडौं । अन्तर्राष्ट्रिय बक्सिङ निर्णायक धनकुमार मैनाली ‘राष्ट्रिय खेलकुद सम्मान २०८१’ बाट सम्मानित भएका छन्। युवा तथा खेलकुद मन्त्रालयले मैनालीसहित ६ खेलाडी, एक प्रशिक्षक, एक निर्णायक र एक चिकित्सकलाई सम्मान गरेको हो।
सन् २०१३ मा राष्ट्रिय निर्णायकबाट यात्रा थालेका मैनालीले २०१९ मा IBA वान स्टार, २०२२ मा टु स्टार, र २०२४ मा काजकिस्तानमा थ्री स्टार रेफ्री/जज सर्टिफिकेसन पास गर्दै नेपालको पहिलो तीन तारे बक्सिङ निर्णायक बन्न सफल भएका हुन्।
उनले नेपालसहित ब्राजिल, भारत, थाइल्याण्ड, बुल्गेरिया, उज्बेकिस्तान, भुटानलगायतका देशमा आयोजित प्रतियोगितामा निर्णायक भूमिका निभाएका छन्।
सम्मान कार्यक्रममा तेक्वान्दोका भरत सिंह महता, कबड्डीकी अनुजा कुलुङ राई, फुटबलकी दिपा शाहीलगायतले पनि सम्मान प्राप्त गरेका थिए। सम्मानित सबैलाई जनही १ लाख नगद पुरस्कार प्रदान गरिएको हो।
कार्यक्रममा खेलमन्त्री तेजुलाल चौधरी, राखेप सदस्य–सचिव टंकलाल घिसिङ, सचिव डा. हरिप्रसाद लम्साल लगायतको उपस्थिति थियो।
