काठमाडौँ: अर्थमन्त्री रामेश्वरप्रसाद खनालले आयातमा आधारित उपभोगलाई आन्तरिक उत्पादनले क्रमशः प्रतिस्थापन गर्नुपर्ने आवश्यकता औँल्याएका छन्। ७४औँ अन्तरराष्ट्रिय भन्सार दिवसका अवसरमा आयोजित कार्यक्रममा उनले आन्तरिक उत्पादन नबढाई अर्थतन्त्र सुधार गर्न कठिन हुने बताउँदै अनावश्यक आयात ऐन–कानुनमार्फत नियन्त्रण गर्नुपर्ने उल्लेख गरे।
भन्सार ऐनको प्रभावकारी कार्यान्वयन र छिट्टै नियमावली ल्याउने प्राथमिकता रहेको जानकारी दिँदै उनले सुधार प्रक्रिया निरन्तर हुने बताए। साथै, प्रतिबन्धित वस्तु र लागूऔषधको अवैध आयातप्रति चासो व्यक्त गरे।
कार्यक्रममा उत्पत्तिको प्रमाणपत्र अब क्युआर कोडसहित अनलाइनमार्फत राष्ट्रिय एकद्वार प्रणालीबाट मात्र जारी हुने व्यवस्था कार्यान्वयनमा आएको जानकारी दिइयो।
अर्थ सचिव घनश्याम उपाध्यायले अनलाइन मूल्याङ्कन प्रणाली र भन्सार प्रशासनमा पारदर्शिता आवश्यक रहेको बताए।
महालेखानियन्त्रक शोभाकान्त पौडेलले अवैध आयात नियन्त्रणमा कडाइ गर्नुपर्ने धारणा राखे। अन्य वक्ताहरूले नयाँ भन्सार ऐन, डाटाबेस प्रणाली र आधुनिकीकरण योजनाले व्यापार सहजीकरण र पारदर्शिता बढाएको बताए।
