काठमाडौँ: अन्तरिम सरकारकी नवनियुक्त प्रधानमन्त्री सुशीला कार्कीले आज पदभार ग्रहण गरेकी छन् । बिहान सिंहदरबारस्थित गृह मन्त्रालयको नयाँ भवनमा पुगेर उनले औपचारिक रूपमा कार्यभार सम्हालेकी हुन् ।
गत शुक्रबार प्रधानमन्त्रीमा नियुक्त भई शपथग्रहण गरेकी कार्कीले आजदेखि औपचारिक रूपमा काम सुरु गरेकी हुन् । सिंहदरबारस्थित प्रधानमन्त्री तथा मन्त्रिपरिषद् कार्यालय जेनजी प्रदर्शनका क्रममा आगजनीबाट क्षतिग्रस्त भएपछि, अस्थायी व्यवस्था स्वरूप गृह मन्त्रालयका लागि बनेको नयाँ भवनमा कार्यालय सञ्चालन गरिएको हो ।
नयाँ भवनमा आगजनीबाट बचाइएका पुराना सरसामान सारेर प्रधानमन्त्रीको कार्यकक्ष तयार पारिएको छ ।
पदभार ग्रहणसँगै आफ्नो पहिलो निर्णयका रूपमा जेनजी आन्दोलनमा ज्यान गुमाएकालाई शहीद घोषणा गर्दै मृतकका परिवारलाई जनही १० लाख रुपैयाँ क्षतिपूर्ति दिने निर्णय गरेकी छिन् ।
आज सिंहदरबारस्थित गृह मन्त्रालयको नयाँ भवनमा पदभार ग्रहण गर्ने क्रममा प्रधानमन्त्री कार्कीले यस सम्बन्धी निर्णयमा हस्ताक्षर गरेकी हुन् ।
त्यसैगरी, आन्दोलनमा घाइते भएकाको निःशुल्क उपचार सरकारको जिम्मामा हुने र मृतकको शवलाई स्थानीय क्षेत्रमा पुर्याउन इच्छुक परिवारलाई शव व्यवस्थापनमा आवश्यक सहजीकरण गर्ने व्यवस्था गर्ने पनि सरकारले जनाएको छ ।
