काठमाडौँ: रामचन्द्र पौडेलले सांस्कृतिक तथा ऐतिहासिक पर्वहरूले विविध जाति, भाषा, संस्कृति र भौगोलिक क्षेत्रका नेपालीबीच आपसी विश्वास, सद्भाव, सहिष्णुता र सहयोगको भावना मजबुत बनाउँदै राष्ट्रिय एकतालाई अझ सुदृढ बनाउने विश्वास व्यक्त गरेका छन्।
राम नवमीका अवसरमा शुभकामना सन्देश दिँदै उनले सम्पूर्ण नेपालीमा सुख, शान्ति र समृद्धिको कामना गरेका छन्। साथै, यस्ता पर्वहरूले आपसी समझदारी, दिगो शान्ति र भाइचाराको भावना विस्तार गर्न प्रेरित गर्ने अपेक्षा पनि व्यक्त गरेका छन्।
हरेक वर्ष चैत महिनाको शुक्ल पक्षको नवमी तिथिमा मर्यादा पुरुषोत्तम भगवान् श्रीरामको जन्मोत्सवका रूपमा राम नवमी पर्व धूमधामका साथ मनाइने परम्परा रहिआएको छ। यस अवसरमा भगवान् श्रीरामको पूजा, व्रत, अनुष्ठान तथा जप गर्ने प्रचलन रहेको छ, जसबाट भगवत् कृपा प्राप्त हुने जनविश्वास छ।
राष्ट्रपति पौडेलले यस्ता प्राचीन र मौलिक पर्वहरूले नेपाली सभ्यता, धर्म र संस्कृतिको संरक्षणमा महत्वपूर्ण भूमिका खेल्दै आएको बताएका छन्।
राम नवमी भगवान् श्रीरामको जन्मदिन मात्र नभई अधर्ममाथि धर्मको विजयको प्रतीकका रूपमा पनि मनाइन्छ। यस दिन देशका विभिन्न स्थानका साथै रामजानकी मन्दिरमा विशेष पूजा तथा भव्य मेला लाग्ने गर्दछ।
