काठमाडौँ: गत फागुन २१ गते सम्पन्न प्रतिनिधिसभा सदस्य निर्वाचनपछि गठन भएको नयाँ संसद्को पहिलो अधिवेशन भोलि (बिहीबार) देखि सुरु हुँदैछ। राष्ट्रिय स्वतन्त्र पार्टी (रास्वपा) ले करिब दुई तिहाइ बहुमत प्राप्त गरेपछि सुरु हुन लागेको यो अधिवेशनलाई राष्ट्रिय तथा अन्तर्राष्ट्रिय रूपमा महत्वका साथ हेरिएको छ।
राष्ट्रपति रामचन्द्र पौडेलले नेपालको संविधानबमोजिम मन्त्रिपरिषद्को सिफारिसमा सङ्घीय संसद्को दुवै सदनको अधिवेशन बिहीबार दिउँसो २:०० बजेका लागि आह्वान गरेका छन्। प्रतिनिधिसभाको बैठक सिंहदरबारस्थित निर्माणाधीन सङ्घीय संसद् भवनको बहुउद्देश्यीय कक्षमा बस्नेछ भने राष्ट्रियसभाको बैठक सङ्घीय सचिवालयस्थित पुरानो भवनमा सञ्चालन हुनेछ। यो राष्ट्रियसभाको २०औँ अधिवेशन हो।
विसं २०६४ मा ६०१ सदस्यीय संविधानसभा गठन भएयता नयाँ बानेश्वरस्थित अन्तर्राष्ट्रिय सम्मेलन केन्द्रमा सञ्चालन हुँदै आएको प्रतिनिधिसभाको बैठक १८ वर्षपछि पुनः सिंहदरबारस्थित संसद् भवनमा बस्न लागेको हो। यसअघि विसं २०१५ मा सम्पन्न पहिलो आमनिर्वाचनपछि संसद् अधिवेशनहरू सिंहदरबारकै पुरानो भवन ९ग्यालरी बैठक०मा सञ्चालन हुने गरेका थिए।
संविधानअनुसार राष्ट्रपतिले प्रतिनिधिसभा निर्वाचनको अन्तिम परिणाम घोषणा भएको मितिले ३० दिनभित्र सङ्घीय संसद्को अधिवेशन आह्वान गर्नुपर्ने व्यवस्था छ। निर्वाचन आयोगले चैत ५ गते ‘प्रतिनिधिसभा सदस्य निर्वाचन २०८२’ को अन्तिम प्रतिवेदन राष्ट्रपतिसमक्ष बुझाएको थियो। सो निर्वाचनमार्फत जनताले रास्वपालाई स्थायित्व र समृद्धिको मार्गमा अगाडि बढाउने जनादेशसहित करिब दुई तिहाइ बहुमत दिएका छन्।
सङ्घीय संसद् सचिवालयका अनुसार दुवै सदनको बैठक सञ्चालनका लागि आवश्यक भौतिक, सुरक्षा, प्राविधिक तथा जनशक्तिसम्बन्धी सबै तयारी पूरा भइसकेको छ। बैठकमा सदस्यहरूको बसाइ व्यवस्था परम्पराअनुसार मिलाइएको छ। प्रतिनिधिसभामा सभामुखको आसनको अगाडि दाहिनेतर्फ सत्तापक्ष, बीचमा सरकार र बायाँतर्फ प्रतिपक्ष रहने व्यवस्था गरिएको छ।
यसअनुसार प्रधानमन्त्री र प्रमुख प्रतिपक्ष दलका नेताको आसन नजिकै रहनेछ। लोकतान्त्रिक संसदीय अभ्यासमा संसद्लाई प्रतिपक्षको सत्ताका रूपमा पनि लिने गरिन्छ। यस अधिवेशनमा सत्तापक्षतर्फ मन्त्रिपरिषद्का सदस्य तथा रास्वपाका सांसदहरू रहनेछन् भने प्रतिपक्षतर्फ एक स्वतन्त्रसहित ९३ सांसद सहभागी हुनेछन्। जनताको सर्वोच्च प्रतिनिधिमूलक संस्थाका रूपमा संसद्लाई महत्वपूर्ण स्थान दिइन्छ।
