काठमाडौं । चोभारमा निर्माण भएको सुख्खा बन्दरगाह सञ्चालनमा आएको छ । प्रधानमन्त्री शेरबहादुर देउवाले मंगलबार वीरगन्ज नाका हुँदै काठमाडौंका लागि मालवस्तु बोकेर आएका ३ वटा कन्टेनर बन्दरगाह भित्र्याउदै बन्दरगाह सञ्चालनमा ल्याएका हुन् ।
हाल संचालनमा आएको चोभार बन्दरगाह सीमावर्ति क्षेत्रभन्दा बाहिर भित्री सहरमा बनेको यो पहिलो बन्दरगाह हो । माल वस्तु आयात र निर्यातका लागि भन्सार, क्वरिन्टिन, सुरक्षा सहितको सबै पूर्वाधार रहेको बन्दरगाहमा ५ सय कन्टेनर र ५ सय ट्रक अटाउने क्षमता छ ।
तेस्रो मुलुकबाट काठमाडौंका लागि मालवस्तु बोकेर आएका ३ कन्टेनरहरु वीरगन्ज नाका हुँदै काठमाडौं आएका हुन् । अब आन्तरिक परिवहन सुविधा अन्तर्गत स्थलमार्ग हुँदै काठमाडौं आउने अन्तर्राष्ट्रिय व्यापारको भन्सार जाँच पास काठमाडौंबाटै हुने छ ।
बन्दरगाह सञ्चालनमा पछि राजधानी केन्द्रित व्यापारका लागि भारत र चीनको समुद्री बन्दरगाहबाट आउने मालसामान बोकेका कन्टेनर अब सिधै काठमाडौं आउन सक्नेछन् भने स्वस्देशी वस्तु निर्यात पनि सोही बन्दरगाहबाट हुनेछ ।
काठमाडौं केन्द्रित व्यवसायीका लागि आयात निर्यातमा महत्वपूर्ण मानिएको चोभारको सुख्खा बन्दरगाह नेपालभारत क्षेत्रीय व्यापार तथा पारवहन आयोजना अन्तर्गत निर्माण भएको हो । विश्व बैंकको एक अर्ब ५४ करोड ऋण सहयोगमा बन्दरगाह निर्माण भएको हो ।
