नाफामुखी उडानमा भ्याईनभ्याई, रामेछापेलीलाई बोक्दैन विमानले

रामेछाप । विदेशीलाई डलरमा टिकट बिक्री गरेर धेरै फाईदा हुने लुक्लाको उडानमा मात्र केन्द्रित भएका निजी क्षेत्रका विमान कम्पनीले रामेछाप – काठमाण्डौं उडानका लागि समेत दवाव थालिएको छ ।
रामेछाप विमानस्थल बाट पर्यटकिय सिजनमा लुक्लाका लागि उडान गर्न भ्याईनभ्याई छ । लुक्लाका लागि दैनिक ५० वटा उडान हुदा काठामाण्डौंका लागि एक उडान पनि नराख्दा वायुसेवा कम्पनी संग जिल्लाबासी रुष्ट हुदै आएका छन् । रामेछाप विमानस्थलमा रात्रिकालिन विमान पार्किङ राखेर लुक्लाका लागि उडान गर्ने तारा, सीता र समिट एयरलाई स्थानीयले पटक पटक सातामा कम्तीमा एउटा उडान काठमाण्डौंका लागि राख्न आग्रह गर्दै आएपनि अटेर गर्दै आएका छन् ।
मनग्ये नाफा हुने क्षेत्रमा उडान केन्द्रीत गरेर रामेछाप विमानस्थललाई कमाउने थलोको रुपमा लिएको तर रामेछाप – काठमाण्डौं उडानका लागि चासो नदिए पछि प्रतिनिधिसभा सदस्य पूर्णवहादुर तामाङ ( कान्छाराम ) ले बायुसेवा प्रदायक कम्पनीका प्रतिनिधि समेतको उपस्थितिमा छलफल थालेका छन् । उनले रामेछाप विमानस्थलबाट आर्थिक लाभ लिनेले रामेछापेलीको सुविधाका लागि पनि ध्यान दिनु पर्ने वताएका छन् ।
‘यो विमानस्थल रामेछापेलीका लागि निर्माण भएको हो ’ तामाङले भने – यसबाट सेवा पाउने पहिलो हक रामेछापेलीको नै हो । ‘विदेशीलाई डलरमा उडाउने जहाजले महिनाको करोड कमाउने तर रामेछापबाट काठमाण्डौं उडाउदा थोरै यात्रु हुन्छन् भनेर भाग्ने कार्य निन्दनिय छ ’ तामाङले भने – रामेछापका बासिन्दाले काठमाण्डौं उडान गर्न पाएनन भने विमानस्थलको के काम ? ।
तामाङले रामेछाप विमानस्थलमा हुदै आएको बायुसेवा कम्पनीको मनोमानीको विषयमा नेपाल नागरिक उडड्यन प्राधिकरणका महाप्रवन्धकको ध्यानाकर्षण समेत गराएका छन् । रामेछापबाट काठमाण्डौंका लागि सातामा कम्तिमा एक उडान राखिदिन महानिर्देशकलाई आग्रह गरेको उनले वताए ।
पर्यटकिय सिजनमा सगरमाथा तर्फ जाने पर्यटकहरुलाई केहि बर्ष देखि रामेछाप विमानस्थलबाट उडाउन थालिएको हो । काठमाण्डौंको विमानस्थलले हवाई चाप थेग्न नसक्ने भएपछि साना विमानलाई रामेछाप विमानस्थलमा राखेर लुक्ला तर्फको उडान गर्न नेपाल नागरिक उडड्यन प्राधिकरणले निर्देशन दिएको थियो । वायुयान कम्पनीले विदेशी पर्यटकलाई काठमाण्डौंबाट लु्क्लाको हवाई दुरीको झण्डै आधा भागमा पर्ने रामेछाप विमानस्थलबाट पर्यटक उडाउदा लगभग उस्तै डलर पाउने गरेका छन् । काठमाण्डौंं देखि रामेछाप सम्म ४ घण्टा सडक मार्गबाट रामेछाप पु¥याईने पर्यटकलाई जहाजले लुक्ला तर्फ लैजाने गरेको छ । लुक्लाबाट फर्कदा पनि सोहि मार्ग प्रयोग हुन्छ ।
जिल्लाबाट दैनिक झण्डै १ हजार ५ सय पर्यटक ओहोर दोहोर गर्दा सामँन्य चिया पसल बाहेक अन्य व्यापार व्यवसाय हुदैन । गाडिबाट सोझै विमानस्थल पुग्ने पर्यटकहरुलाई फर्कदा लुक्लाको उडानबाट झर्ने वित्तिकै गाडि चढाएर काठमाण्डौ लैजाने गरीएको छ । रामेछापबासीलाई विमानस्थलबाट दैनिक दर्जनौ उडान र अवतरण हुने कुरा ‘कागलाई बेल पाक्यो हर्ष न विस्मात’ भएको छ ।
विमानले काठमाण्डौंको उडान नराख्दा रामेछापेली नागरीक भने लाखौं खर्चेर हेलिकप्टर बाट काठमाण्डौं जानु पर्ने बाध्यता छ । विरामी, असक्त, गर्भवति, शल्यक्रिया गरेर घर फर्कनेहरु, वृद्धवद्धाले सडक मार्गबाट कष्टकर यात्रा गर्नुपरेको छ ।