सुर्खेत – कर्णाली प्रदेशका मुख्यमन्त्री महेन्द्रबहादुर शाहीले राजीनामा दिएका छन् । सोमवार साँझ पत्रकार सम्मेलन गरी उनले पदबाट राजीनामा घोषणा गरेका हुन् । पत्रकार सम्मेलनमा उनले सत्ता गठबन्धनबीच यसअघि गरिएका राजनीतिक सहमतिप्रति इमान्दार हुँदै नेपाली कांग्रेसलाई नयाँ सरकार गठनका लागि मार्ग प्रशस्त गरेको बताए ।
सत्ता साझेदार नेपाली कांग्रेससँग आलोपालो सरकारको नेतृत्व गर्ने पूर्वसहमतिअनुसार शाहीले राजीनामा दिएका हुन् । गत वैशाख ३ गते प्रदेश सभाबाट विश्वासको मत लिँदा नेपाली कांग्रेससँग आलोपालो सरकारको नेतृत्व गर्ने सहमति थियो । ६ महिनापछि सत्ता हस्तान्तरण गर्ने सहमतिअनुसार कांग्रेसले मुख्यमन्त्री शाहीलाई विश्वासको मत दिएको थियो ।
पूर्वसहमति कार्यान्वयनका लागि शाहीले राजीनामा दिएका हुन् । उनी २०७४ फागुन ३ गते मुख्यमन्त्रीमा नियुक्त भएका थिए ।
अब कांग्रेस संसदीय दलका नेता जीवनबहादुर शाही प्रदेशको मुख्यमन्त्री बन्नेछन् ।
