काठमाडौँ: उपप्रधानमन्त्री तथा नेपाली कांग्रेस नेता प्रकाशमान सिंहको चाक्सीबारीस्थित निवासमा सोमबार दिउँसो पार्टीका सात वरिष्ठ नेताबीच भेटवार्ता भएको छ।
भेटमा हाल संस्थापन पक्षमा रहेका पूर्वपदाधिकारीहरूबीच समसामयिक राजनीतिक विषयहरूमा छलफल भएको जनाइएको छ। सिंहको उपस्थितिमा भएको भेटवार्तामा पूर्वउपसभापतिहरू विजयकुमार गच्छदार, गोपालमान श्रेष्ठ र विमलेन्द्र निधि, पूर्वमहामन्त्रीहरू कृष्णप्रसाद सिटौला र शशांक कोइराला तथा पूर्वसहमहामन्त्री प्रकाशशरण महत सहभागी रहेको थियो।
आगामी महाधिवेशनलाई केन्द्रमा राख्दै सातवटै प्रदेशमा व्यापक छलफल र भेटघाट अभियान सञ्चालन गर्ने तयारी भईरहेको बेला यही विषयमा प्रारम्भिक सल्लाहका लागि आजको बैठक आयोजना गरिएको स्रोतले जनाएको छ।
