जाजरकोट । जाजरकोटमा एक युवकको हत्या भएको छ। हत्या भएका किशोर भेरी नगरपालिका–३ स्याला निवासी १८ वर्षीय प्रकाशजंग शाह रहेको प्रहरीले जनाएको छ। पश्चिम रुकुम आठबिसकोट बाम्नीखेतमा लाग्ने मेला हेर्न गएका शाहको हत्या भएको हो ।
मंसिर ३ गते भेरी–१ रावतगाउँ तथा कोलचौरका केही युवाहरुसँग प्रकाश र उनकासाथीहरुको विवाद भएपछि मेलामै हात हालाहाल भएको जनाइएको छ। दिउँसो मिलापत्र गरिए पनि बेलुका फेरि झगडा भएको र कुटपिटबाट प्रकाशको हत्या भएको थियो। उनका साथीहरुले भागेर ज्यान बचाएको बताइएको छ।
उनी घर नफर्केपछि खोजी गर्ने क्रममा तीन दिन पछि भेरी–१ स्थित भेरी नदीको खोचमा मृत फेला परेको प्रहरीको भनाइ छ। प्रकाशको टाउकोमा गहिरो चोट लागेको जनाइएको छ। उनी कक्षा ११ मा अध्ययनरत थिए।
