कवर्ड हल बनेपछि स्थानीय तहले जिम्मा लिनुपर्छ : सदस्य सचिव लामा

रामेछाप । रामेछापमा निर्माण सम्पन्न भएको कवर्ड हलको सञ्चालन तथा व्यवस्थापनको जिम्मेवारी अब स्थानीय तहले लिनुपर्ने बागमती प्रदेश खेलकुद विकास परिषद्का सदस्य सचिव दिपक लामाले बताएका छन्।
कवर्ड हलको निरीक्षणका क्रममा लामाले कवर्ड हल निर्माण गर्ने काम प्रदेश सरकारको भए पनि यसको संरक्षण, सञ्चालन र प्रभावकारी उपयोगको जिम्मेवारी स्थानीय तहले लिनुपर्ने बताएका हुन्।
उनले कवर्ड हल रामेछापको गौरव बढाउने महत्वपूर्ण खेल पूर्वाधार भएको बताउँदै यसबाट जिल्लाले ठूलो संख्यामा खेलाडी उत्पादन गर्न सक्ने बताए।
यो कवर्ड हलले रामेछापबाट कति खेलाडी उत्पादन गर्छ भन्ने कल्पना पनि गर्न सकिँदैन, लामाले भने।
अहिले प्रदेश सरकार खेलकुद विकासका क्षेत्रमा ‘स्प्रिडमा’ रहेको उल्लेख गर्दै उनले स्थानीय नागरिकले विकासका विषयमा मुद्दा उठाउने मात्र नभई रचनात्मक सुझावसमेत दिनुपर्ने बताए।
लामाले खेलाडीले खेलकुदमै केन्द्रित हुनुपर्नेमा जोड दिँदै “खेलाडी खेलसँग लाग्नुपर्छ, राजनीति होइन” भन्ने धारणा राखे।
कवर्ड हलको उचित सञ्चालन र नियमित उपयोग हुन सके रामेछापमा भलिबल, ब्याडमिन्टन र बास्केटबललगायतका खेलको विकासमा महत्वपूर्ण योगदान पुग्ने उनको भनाइ थियो।