काठमाडौं: अन्तरिम सरकारका नवनियुक्त तीन मन्त्रीहरूले आज पद तथा गोपनीयताको शपथ ग्रहण गरेका छन्। प्रधानमन्त्री सुशीला कार्कीले आइतबार मन्त्रिपरिषद् विस्तार गर्दै तीन जनालाई सरकारमा समावेश गरेकी थिइन्।
गृहमन्त्रीसहित कानुन मन्त्रालयको जिम्मेवारी ओमप्रकाश अर्याललाई दिइएको छ भने नेपाल विद्युत् प्राधिकरणका पूर्व कार्यकारी निर्देशक कुलमान घिसिङ ऊर्जा, जलस्रोत तथा सिँचाइ मन्त्री बनेका छन्। त्यस्तै, पूर्व अर्थसचिव रामेश्वर खनालले अर्थ मन्त्रालयको जिम्मेवारी सम्हालेका छन्।
शपथग्रहण समारोह राष्ट्रपति भवन शीतल निवासमा आयोजना गरिएको थियो। टेन्ट टाँगेर तयार पारिएको मञ्चमा सामान्य कार्पेट बिछ्याइएको थियो। कार्यक्रममा राष्ट्रपति रामचन्द्र पौडेल, उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमान सिंह राउत, राष्ट्रिय सभाका अध्यक्ष नारायण दाहाललगायत विशिष्ट व्यक्तिहरूको उपस्थिति थियो।
