काठमाडौं: गृहमन्त्री ओमप्रकाश अर्यालले प्रतिनिधिसभा निर्वाचन तोकिएकै मितिमा हुने स्पष्ट गर्दै सरकारले आवश्यक तयारी पूरा गरिरहेको बताएका छन्। प्रदेशस्तरीय सुरक्षा गोष्ठीका सिलसिलामा धनगढी पुगेका गृहमन्त्रीले निर्वाचनको वातावरण सुनिश्चित गरिएको दाबी गरे।
उनका अनुसार सरकारको मुख्य जिम्मेवारी समयमै, भयरहित र शान्तिपूर्ण वातावरणमा चुनाव सम्पन्न गर्नु हो। “हामी पूर्ण तयारीमा छौँ, निर्धारित मितिमै निर्वाचन हुनेछ भन्ने विश्वास दिलाउन चाहन्छु,” गृहमन्त्री अर्यालले भने। उनले राजनीतिक दलहरूको चुनावी गतिविधि सहज रूपमा सञ्चालन हुने वातावरण तयार पारिएको पनि बताए।
जेनजी आन्दोलनका कारण केही समय सुरक्षा संयन्त्र र प्रशासनिक कामकाज प्रभावित भए पनि अब सबै क्षेत्र लयमा फर्किएको गृहमन्त्रीको भनाइ थियो। लोकतान्त्रिक व्यवस्थामा निर्वाचन अपरिहार्य रहेको उल्लेख गर्दै उनले केही मनोवैज्ञानिक चुनौती देखिए पनि सरकार कानुन कार्यान्वयनमा दृढ रहेको जिकिर गरे।
हिंसा तथा अराजकता रोकथामका लागि सरकार प्रतिबद्ध रहेको र त्यसअनुसार सुरक्षा संयन्त्र परिचालन भइरहेको उनले स्पष्ट पारे। “देश निर्माण सबैको जिम्मेवारी हो, यस विषयमा ढुक्क हुन आग्रह गर्दछु,” गृहमन्त्री अर्यालले भने।
सुरक्षा गोष्ठीमा सुदूरपश्चिम प्रदेशका मुख्यमन्त्री कमलबहादुर शाह, आन्तरिक मामिला तथा कानुनमन्त्री हीरासिंह सार्कीलगायतले मन्तव्य राखेका थिए। बैठकमा गृहसचिव, चारवटै सुरक्षा निकायका प्रमुख तथा सबै नौ जिल्लाका प्रमुख जिल्ला अधिकारीहरूको सहभागिता थियो।
