काठमाडौँ: राष्ट्रपति रामचन्द्र पौडेलले नेपाल र नेपालीको प्रतिष्ठा अभिवृद्धिमा शेर्पा समुदायको उल्लेखनीय भूमिका रहेको बताएका छन्।
नेपाल शेर्पा सङ्घद्वारा २१५३औँ ग्याल्पो लोसार ९नयाँ वर्ष० का अवसरमा आज शीतल निवासमा आयोजित कार्यक्रममा राष्ट्रपति पौडेलले यस्तो धारणा व्यक्त गरेका हुन्।
उनले भनृ, “पर्यटन र पर्वतारोहणका क्षेत्रमा ख्याति कमाएको शेर्पा समुदाय इमान्दार, परिश्रमी र प्रकृतिप्रेमी जातिका रूपमा परिचित छ। शताब्दीयौँदेखि नेपालको हिमाली क्षेत्रबाट फैलिएको यो समुदाय आज विश्वभर फैलिँदै आफ्नो समुदाय मात्र नभई नेपाल र नेपालीको प्रतिष्ठा बढाउन उल्लेखनीय भूमिका निर्वाह गरिरहेको देख्दा खुशी लाग्छ।”
हिमाल, पहाड र तराईको अनुपम भौगोलिक तथा सांस्कृतिक विविधता रहेको नेपालका विभिन्न जातजातिमध्ये शेर्पा समुदायको आफ्नै विशिष्ट परम्परा, संस्कृति, सभ्यता र पहिचान रहेको उल्लेख गर्दै राष्ट्रपति पौडेलले यस समुदायलाई नेपालको आदिवासी समुदायका रूपमा चिनाउँदै देशको शान, गौरव र प्रतिष्ठा अभिवृद्धिमा यसको महत्वपूर्ण योगदान रहेको बताए।
“हाम्रो मौलिक पहिचान भनेकै यहाँ रहेका विविध जातजाति, भाषाभाषी, संस्कृति, रहनसहन, परम्परा र चाडपर्व हुन्,” उनले भने।
यस्ता चाडपर्वहरूले आपसी सद्भाव, एकता, मित्रता र भ्रातृत्वको भावना बलियो बनाउँदै आएको उल्लेख गर्दै राष्ट्रपति पौडेलले मौलिक नेपाली पहिचानलाई अक्षुण्ण राख्दै राष्ट्रिय एकताको भावनालाई थप सुदृढ बनाउनु सबैको साझा दायित्व भएको बताए।
सुशासनमार्फत समृद्धि हासिल भएमा मुलुकमा शान्ति, स्थायित्व र राष्ट्रिय एकता अझ मजबुत हुने उनको भनाइ थियो। लोकतान्त्रिक व्यवस्थामा जनताको अभिमत लिने सबैभन्दा उपयुक्त माध्यम निर्वाचन भएकाले फागुन २१ गतेका लागि तय प्रतिनिधिसभा सदस्य निर्वाचनलाई सफल बनाउन आजको पावन अवसरमा सबैलाई आह्वान गरे।
