रामेछाप । जिल्ला प्रशासन कार्यालय रामेछापको आयोजनामा गोकुलगंगा गाउँपालिकाको कार्यालयमा जनप्रतिनिधि, कर्मचारी र नागरिकको सहभागितामा सार्वजनिक सुनुवाइ कार्यक्रम सम्पन्न भएको छ।
कार्यक्रममा जिल्लामा देखिएका लागुऔषधका समस्या तथा त्यसको नियन्त्रणका विषयमा जिल्ला प्रहरी कार्यालय रामेछापका प्रमुख भोला भट्टले जानकारीमूलक प्रस्तुति दिनुभएको थियो। साथै, जनप्रतिनिधि र कर्मचारीको काम–कर्तव्य, कानुनी दायित्व तथा देखिएका समस्यामाथि सवाल–जवाफसमेत गरिएको थियो।
जिल्ला प्रशासन कार्यालयमा गरिने सिफारिस तथा कानुनी प्रक्रियाबारे कार्यालयका नायब सुब्बा लक्ष्मण भुजेलले स्पष्ट पार्नुभयो। प्रमुख जिल्ला अधिकारी श्यामकृष्ण थापाले नागरिकलाई प्रदान गरिने सेवामा छिटोछरितो र प्रभावकारी ढंगले काम भइरहेको उल्लेख गर्दै जनप्रतिनिधि र कर्मचारीलाई कानुनको पालना गर्न आग्रह गर्नुभयो।
कार्यक्रमलाई सम्बोधन गर्दै गोकुलगंगा गाउँपालिकाका अध्यक्ष काजीबहादुर खड्काले जिल्ला प्रशासन कार्यालयको कामप्रति जनप्रतिनिधि, कर्मचारी मात्र होइन नागरिकसमेत सन्तुष्ट रहेको बताउनुभयो। “प्रशासन कार्यालयमा हुने काम सहजै गरिदिने र नहुने काममा स्पष्ट कारणसहित निकास दिने गरेको छ,” उहाँले भन्नुभयो, “हामी जनप्रतिनिधि नागरिकका कुरा राख्ने माध्यम मात्र हौँ, नागरिकले दुःख नपाउँदा हामी खुसी हुन्छौँ।”
गाउँपालिकाका प्रवक्ता चन्द्र सुनुवारले यस्ता सार्वजनिक सुनुवाइ कार्यक्रमले जनप्रतिनिधिको कामलाई सहज बनाउने बताउँदै यस्ता कार्यक्रम समय–समयमा आवश्यक पर्ने धारणा व्यक्त गर्नुभयो।
कार्यक्रममा नेपाल पत्रकार महासंघका केन्द्रीय सदस्य नवराज पथीक, जिल्ला अध्यक्ष दिपक घिमिरे लगायत सञ्चारकर्मीहरूको उपस्थिति रहेको थियो।
