काठमाडौं: रामचन्द्र पौडेलले प्रतिनिधिसभाका नवनिर्वाचित ज्येष्ठ सदस्य अर्जुननरसिंह केसीलाई पद तथा गोपनीयताको शपथ गराएका छन्।
राष्ट्रपति कार्यालयमा बुधबार आयोजित विशेष समारोहमा राष्ट्रपति पौडेलले केसीलाई शपथ गराएका हुन्। उक्त कार्यक्रममा उपराष्ट्रपति रामसहायप्रसाद यादव, प्रधान न्यायाधीश प्रकाशमान सिंह राउत तथा राष्ट्रियसभाका अध्यक्ष नारायणप्रसाद दाहालको उपस्थिति रहेको थियो।
समारोहमा मन्त्रीहरू, नवनिर्वाचित सांसदहरू, संवैधानिक निकायका प्रमुखहरू, नेपाल सरकारका विशिष्ट श्रेणीका अधिकारीहरू तथा सुरक्षा निकायका प्रमुखहरू समेत सहभागी थिए।
गत फागुन २१ गते सम्पन्न प्रतिनिधिसभा सदस्य निर्वाचनपछि संसद् बैठक आह्वान गर्ने तयारी भइरहेको छ। सोही तयारीअन्तर्गत ज्येष्ठ सदस्य केसीले बुधबार शपथ लिएका हुन्। ७८ वर्षीय केसीले संघीय संसद् सचिवालयका अनुसार बिहीबार प्रतिनिधिसभाका बाँकी २७४ जना नवनिर्वाचित सदस्यलाई शपथ गराउनेछन्।
नयाँ सभामुख चयन नभएसम्म प्रतिनिधिसभाको बैठकको अध्यक्षता पनि ज्येष्ठ सदस्य केसीले नै गर्नेछन्।
