काठमाडौँ: प्रतिनिधिसभाअन्तर्गतका विषयगत समितिहरूका सभापति चयनका लागि वैशाख ४ गते निर्वाचन हुने भएको छ। ‘मिनी संसद्’ का रूपमा चिनिने यी समितिहरूको निर्वाचनका लागि सङ्घीय संसद् सचिवालयले पूर्वनिर्धारित कार्यक्रम सार्वजनिक गरिसकेको छ।
निर्वाचन तालिकाअनुसार बिहीबार दिउँसो १ बजेदेखि ४ बजेसम्म सम्बन्धित समितिका सदस्यलाई सभापतिमा निर्वाचित गरियोस् भन्ने प्रस्ताव दर्ता गर्न सकिनेछ। प्रस्ताव दर्ता गर्दा एक जना सदस्य प्रस्तावक र सोही समितिका अर्का सदस्य समर्थक हुनुपर्ने व्यवस्था रहेको प्रतिनिधिसभाका सचिव हर्कराज राईले जानकारी दिए।
दर्ता भएका प्रस्तावहरूको सूची सोही दिन साँझ ४: ३० बजेसम्म प्रकाशित गरिनेछ। त्यसपछि शुक्रबार दिउँसो १ बजे बस्ने समितिको बैठकमा प्रस्ताव पेश, समर्थन र निर्णयका लागि मतदान प्रक्रिया अघि बढाइनेछ।
यदि कुनै मन्त्री एकभन्दा बढी समितिको सदस्य भएको अवस्थामा मतदान गर्नुपर्ने भएमा, त्यसबारे निर्वाचन हुनुभन्दा २४ घण्टा अगाडि सम्बन्धित समितिलाई लिखित जानकारी गराउनुपर्ने सचिवालयले जनाएको छ।
हाल सङ्घीय संसद्अन्तर्गत प्रतिनिधिसभाका १०, राष्ट्रियसभाका ४ र दुई संयुक्त समिति रहेका छन्। प्रतिनिधिसभाअन्तर्गत कानुन, न्याय तथा मानवअधिकार, कृषि तथा प्राकृतिक स्रोत, पूर्वाधार विकास, महिला तथा सामाजिक मामिला, राज्य व्यवस्था तथा सुशासन, शिक्षा, स्वास्थ्य तथा सूचना प्रविधि, सार्वजनिक लेखा, अर्थ, अन्तर्राष्ट्रिय सम्बन्ध तथा पर्यटन र उद्योग, वाणिज्य, श्रम तथा उपभोक्ता हित समितिहरू सञ्चालनमा छन्।
संयुक्त समितिमा संसदीय सुनुवाइ तथा राज्यका निर्देशक सिद्धान्त, नीति र दायित्व कार्यान्वयन अनुगमन तथा मूल्याङ्कन समिति रहेका छन्।
