भक्तपुर, २५ असार
बागमती प्रदेश सरकारको स्वास्थ्य मन्त्रालयले मिर्गौलाका बिरामीका लागि सेवा विस्तार गर्ने उद्देश्यले भक्तपुर अस्पतालसहित प्रदेशका विभिन्न अस्पतालमा १६ वटा डायलासिस मेसिन जडान गरेको छ।
स्वास्थ्य मन्त्रालयका अनुसार सरकारी अस्पतालमा डायलासिस सेवाको माग उच्च भएसँगै निजी अस्पतालमा एकपटकको उपचारका लागि करिब रु २,५०० तिर्नुपर्ने बाध्यतालाई घटाउन यो पहल गरिएको हो।
बागमती प्रदेशका स्वास्थ्य मन्त्री किरण थापाले भक्तपुर अस्पतालमा पाँच वटा डायलासिस मेसिन जडान गरिएको जानकारी दिनुभयो। यसैगरी, धादिङ, सिन्धुली र त्रिशूली अस्पतालमा दुई–दुई वटा, बकुलहर रत्ननगर अस्पतालमा दुई वटा तथा हेटौँडा अस्पतालमा तीन वटा मेसिन जडान गरिएको उहाँले बताउनुभयो।
डायलासिस मेसिन जडानसँगै बिरामीले अब नजिकको सरकारी अस्पतालबाट नै सहज रूपमा सेवा लिन सक्ने मन्त्री थापाले जानकारी दिनुभयो। आगामी दिनमा अन्य अस्पतालमा पनि उपकरण थप गर्दै लैजाने योजना रहेको उहाँको भनाइ छ।
भक्तपुर अस्पतालका कार्यकारी निर्देशक डा. सुरेन्द्र भट्टका अनुसार अस्पतालमा जडान गरिएका पाँचवटा मेसिनमार्फत चाँडै पाँच शय्यामा डायलासिस सेवा सुरु गरिनेछ।
