काठमाडौं: आजदेखि कक्षा १२ को वार्षिक परीक्षा सुरु भएको छ । राष्ट्रिय परीक्षा बोर्डका अनुसार परीक्षा बिहान ८ बजेदेखि सञ्चालनमा आएको हो।
यस वर्षको परीक्षामा कुल ४ लाख १८ हजार ८ जना परीक्षार्थी सहभागी भएका छन् । तीमध्ये नियमिततर्फ ३ लाख ३२ हजार १ सय ७८ र आंशिकतर्फ ८५ हजार ८ सय ३० जना विद्यार्थी रहेका बोर्डले जनाएको छ । २०७९ साल यताका विद्यार्थीहरू आंशिक परीक्षामा सहभागी हुँदैछन् ।
विदेशस्थित जापानको एभरेस्ट स्कुलबाट समेत ३६ जना विद्यार्थी परीक्षामा सहभागी भएका छन् । जिल्लागत रूपमा काठमाडौंमा सबैभन्दा बढी ६४ हजार ३ सय ३८ परीक्षार्थी रहेका छन् भने मनाङमा सबैभन्दा कम ३१ जना परीक्षार्थी छन्।
परीक्षा बिहान ८ बजेदेखि ११ बजेसम्म सञ्चालन हुनेछ । परीक्षा केन्द्रमा मोबाइल फोन, स्मार्ट घडी लगायत विद्युतीय उपकरण लैजान निषेध गरिएको बोर्डले जनाएको छ ।
कक्षा १२ को परीक्षा आगामी वैशाख २७ गतेसम्म सञ्चालन हुनेछ । परीक्षा सकिएको करिब ४५ दिनभित्र नतिजा सार्वजनिक गर्ने तयारी बोर्डले गरेको छ ।
