काठमाडौँ, २५ असार
आज राति १२ बजेदेखि सबै सरकारी खाता एक साताका लागि रोक्का गरिने भएको छ। आर्थिक कार्यविधि तथा वित्तीय उत्तरदायित्व नियमावली, २०७७ को नियम ३० अनुसार महालेखा नियन्त्रक कार्यालय (मलेनिका), प्रदेश लेखा नियन्त्रक कार्यालय (प्रलेनिका) र सबै जिल्लाका कोष तथा लेखा नियन्त्रक कार्यालय (कोलेनिका)ले सञ्चालन गर्ने सरकारी खाता बन्द गरिने मलेनिकाकी प्रवक्ता सुशीला अर्यालले जानकारी दिनुभयो।
प्रवक्ता अर्यालका अनुसार चालु आर्थिक वर्ष २०८१/८२ का लागि सिर्जित दायित्वअनुसार बजेट रकम निकासा गर्ने आज अन्तिम दिन हो। आज रातिदेखि स्थानीय सञ्चित कोष व्यवस्थापन प्रणाली (सूत्र), एकल खाता कोष प्रणाली (TSA) र कम्प्युटरकृत सरकारी लेखाप्रणाली प्रणाली (सिगास) एक साताका लागि बन्द हुनेछन्।
अघिल्ला वर्षहरूमा मलेनिकाले प्रलेनिका तथा कोलेनिकालाई असारको अन्तिम साता बजेट निकासा रोक्न परिपत्र गर्दै आएको भए पनि यसपटक भने ऐनमा भएको बाध्यकारी व्यवस्थाका कारण यस्तो परिपत्र नगरिएको उहाँले बताउनुभयो।
“कानुनअनुसार आर्थिक वर्ष समाप्त हुनु एक साताअघि सबै सरकारी खाता रोक्का गर्नुपर्छ। आज रातिदेखि अत्यावश्यक प्रयोजनबाहेक कुनै पनि खर्चको भुक्तानी गरिने छैन,” अर्यालले भन्नुभयो। अत्यावश्यक खर्चको भुक्तानीका लागि मलेनिकाको सहमति आवश्यक हुने व्यवस्था नियमावलीमा उल्लेख छ।
महालेखा नियन्त्रक कार्यालयका अनुसार चालु आर्थिक वर्षको अन्तिम भुक्तानी दिनको अघिल्लो दिनसम्म (मंगलबार) कुल बजेट खर्च करिब ७९ प्रतिशत पुगेको छ। सो अवधिमा चालु खर्च ८४ प्रतिशत, पुँजीगत खर्च ५३ प्रतिशत र वित्तीय व्यवस्थातर्फ ८६ प्रतिशत खर्च भएको कार्यालयले जनाएको छ।
