काठमाडौँ: बागमती प्रदेशका मुख्यमन्त्री बहादुरसिंह लामाले सोमबार पदबाट राजीनामा दिनुभएको छ। उहाँले आफ्ना प्रमुख स्वकीय सचिव छत्रबहादुर लामामार्फत राजीनामा पत्र प्रदेश प्रमुखको कार्यालयमा बुझाउनुभएको हो।
प्रदेश प्रमुख कार्यालयका प्रवक्ता देवेन्द्र सापकोटाका अनुसार प्रमुख स्वकीय सचिव लामा सोमबार हेटौँडास्थित कार्यालयमा पुगेर राजीनामा पत्र बुझाउनुभएको हो।
साउन १४ गते भएको नेपाली कांग्रेसको बागमती प्रदेश संसदीय दलको नेतापदको निर्वाचनमा इन्द्रबहादुर बानियाँसँग पराजित भएपछि पार्टी सभापति शेरबहादुर देउवाको निर्देशनअनुसार लामाले राजीनामा दिनुभएको हो।
उहाँको राजीनामासँगै कांग्रेस संसदीय दलका नवनिर्वाचित नेता बानियाँको नेतृत्वमा नयाँ सरकार गठन प्रक्रिया अघि बढ्छ।
