नेतृत्व सुध्रिए मात्रै जनविश्वास फर्किन्छ : शंकर पोखरेल

रामेछाप, नेकपा (एमाले) का महासचिव शंकर पोखरेल ले नेतृत्वको कार्यशैलीमा सुधार नगरे जनविश्वास पुनः स्थापित गर्न कठिन हुने बताएका छन्।
नेकपा (एमाले) जिल्ला पार्टी कार्यालय उद्घाटन कार्यक्रममा प्रमुख अतिथिका रूपमा सम्बोधन गर्दै महासचिव पोखरेलले नागरिकले नेतृत्वप्रति विश्वास नगरेको यथार्थ स्वीकार गर्दै अब नेतृत्व आफैँ सुध्रिनुपर्ने बताए।
उनले खर्चिलो र भड्किलो जीवनशैलीले नागरिकमा निराशा बढाएको उल्लेख गर्दै नेतृत्व स्वयं उत्पादनमूलक कार्यमा संलग्न हुनुपर्ने धारणा राखे। राजनीति जनतासँग जोडिएर अघि बढ्नुपर्ने भन्दै उनले जनताले नेतृत्व खोज्ने होइन, नेतृत्व नै जनतामाझ पुग्नुपर्छ, त्यसपछि मात्रै विश्वास बढ्छ , भने।
महासचिव पोखरेलले युवाले पार्टीलाई अस्वीकार नगरेको, तर वर्तमान देखे पनि भविष्य नदेखेकाले पार्टीले युवामा आशा र भविष्यको भरोसा जगाउने काम गर्नुपर्ने बताए।
कार्यक्रममा एमालेका जिल्ला इन्चार्ज माधव ढुङ्गेल, केन्द्रीय सदस्य गीता कार्की, बागमती प्रदेश अध्यक्ष कैलाशप्रसाद ढुङ्गेल, प्रदेश कमिटी सदस्यहरू तथा पार्टीका नेता कार्यकर्ताको उपस्थिति रहेको थियो।
कार्यक्रममा जिल्ला अध्यक्ष पुरुषोत्तम कडेरीयाले पार्टी कार्यालय विचार, संगठन र कार्यकर्तालाई एकताबद्ध गर्ने केन्द्रका रूपमा रहने उल्लेख गर्दै भवन निर्माणमा सहयोग गर्ने सबैप्रति आभार व्यक्त गरे।