काठमाडौँ: नेपाली कांग्रेसको केन्द्रीय कार्यसमिति बैठक आज दिउँसो १ बजे पार्टीको केन्द्रीय कार्यालय बिपी स्मृति भवन, ललितपुरमा बस्ने भएको छ।
गत असोज २८ गतेदेखि सुरु भएको बैठक ‘जेनजी’ प्रदर्शन, अन्तरिम सरकार गठन, प्रतिनिधिसभा विघटनपछि उत्पन्न राजनीतिक अवस्था र त्यसमा पार्टीको भूमिकामा केन्द्रित रहेको जनाइएको छ।
आजको बैठकमा पार्टीको १५औँ महाधिवेशन सम्बन्धी विषयमा विशेष छलफल हुने तयारी छ। सभापति शेरबहादुर देउवा नेतृत्वको वर्तमान कार्यसमितिको कार्यकाल मङ्सिरभित्र सकिँदैछ। यस्तो अवस्थामा नियमित महाधिवेशन गर्ने वा विशेष महाधिवेशन बोलाउने भन्ने विषयमा नेतृत्वस्तरमा बहस चलिरहेको छ।
विशेष महाधिवेशनको माग गर्दै केही नेताहरूले हस्ताक्षर अभियान समेत सञ्चालन गरेका छन्, जसमा करिब ५४ प्रतिशत महाधिवेशन प्रतिनिधिहरूले समर्थन जनाएका छन्।
स्वास्थ्य समस्याका कारण सभापति देउवाले उपसभापति पूर्णबहादुर खड्कालाई कार्यवाहक सभापतिको जिम्मेवारी दिएका छन्, र त्यसयता बैठक उहाँकै अध्यक्षतामा सञ्चालन हुँदै आएको छ।
तिहार र छठ पर्वका कारण बैठक स्थगित भएको थियो। कात्तिक १ गते बसेको अन्तिम बैठकले पूर्वकेन्द्रीय सदस्य ऋषिकेश गौतमप्रति श्रद्धाञ्जलि अर्पण गर्दै आज पुनः बैठक बस्ने निर्णय गरेको थियो।
