काठमाडौँ: निर्वाचन आयोगले आगामी फागुन २१ गते हुने प्रतिनिधिसभा सदस्य निर्वाचनका लागि समानुपातिक निर्वाचन प्रणालीअन्तर्गतको निर्वाचन अधिकृतको कार्यालय स्थापना गरेको छ। सोमबार आयोग परिसरमै उक्त कार्यालयको औपचारिक उद्घाटन कार्यवाहक प्रमुख निर्वाचन आयुक्त रामप्रसाद भण्डारीले गर्नुभएको हो, भन्ने जानकारी आयोगका प्रवक्ता नारायणप्रसाद भट्टराईले दिएका छन्।
मंसिर १२ गतेको आयोग निर्णयअनुसार समानुपातिक प्रणालीका निर्वाचन अधिकृतका रूपमा आयोगका सचिव महादेव पन्थले जिम्मेवारी सम्हालेका छन्। त्यस्तै, सहायक निर्वाचन अधिकृतमा सहसचिव यज्ञप्रसाद भट्टराई तोकिएको छ। समानुपातिक निर्वाचन व्यवस्थापनका लागि ४१ कर्मचारी परिचालन गरिने आयोगले जनाएको छ। २७५ सदस्यीय प्रतिनिधिसभामा समानुपातिक प्रणालीबाट ११० जना सांसद निर्वाचित हुने व्यवस्था छ।
उद्घाटन समारोहमा आयुक्त भण्डारीले समानुपातिक प्रणालीअन्तर्गतका सबै कार्य निर्वाचन अधिकृतको कार्यालयबाट हुने भएकाले प्रक्रियागत रूपमा सरोकारवालाहरूलाई सहज हुने विश्वास व्यक्त गरे। उनले कानुनअनुसार जातीय, भौगोलिक, लैङ्गिक तथा अन्य समूह छुट्याएर प्रतिनिधि चयन गर्न राष्ट्रिय तथ्याङ्क कार्यालयको सहयोगसमेत रहने बताए।
कार्यक्रममा आयोगका आयुक्तहरू डा. जानकीकुमारी तुलाधर, रगुन शम्शेर जबरा तथा आयोगका कर्मचारीहरू उपस्थित थिए। त्यसैगरी सोमबार अर्थमन्त्री रामेश्वरप्रसाद खनाल र कानूनमन्त्री अनिलकुमार सिन्हाले आयोगका पदाधिकारीसँग निर्वाचन पूर्वतयारी र सरकारद्वारा उपलब्ध गरिनुपर्ने सहयोगबारे छलफल गरेका थिए। छलफलमा अर्थमन्त्रीले निर्वाचनका लागि आवश्यक बजेट अभाव हुन नदिने प्रतिबद्धता जनाए।
कानूनमन्त्री सिन्हाले निर्वाचनसम्बन्धी कानूनी सहयोग उपलब्ध गराउने तथा निर्वाचन प्रक्रियामा स्वदेशी वस्तुको प्रयोग गर्न आग्रह गरे। छलफलले प्रतिनिधिसभा र राष्ट्रियसभा निर्वाचन स्वच्छ, स्वतन्त्र तथा भयरहित वातावरणमा सम्पन्न गर्न थप सहजीकरण गर्ने आयोगका प्रवक्ता भट्टराईले बताए।
