काठमाडौँ: निर्वाचन आयोगले कुनै राजनीतिक दललाई आवश्यक परेमा देशभरका मतदाताको विवरण निश्चित शुल्क लिएर उपलब्ध गराउने व्यवस्था गरेको छ।
आयोगले तयार पारेको प्रतिनिधिसभा सदस्य निर्वाचन निर्देशिकाअनुसार देशभरको मतदाता नामावलीका लागि १० हजार रुपैयाँ तिरेर विवरण लिन सकिनेछ। उक्त विवरण आयोगमा निर्वाचन प्रयोजनका लागि दर्ता भएका राजनीतिक दललाई दलको औपचारिक पत्रको आधारमा उपलब्ध गराइने व्यवस्था गरिएको छ। आयोगले मतदाताको जन्ममिति, नागरिकता नम्बर र मोबाइल नम्बरबाहेकका विवरण विद्युतीय माध्यमबाट उपलब्ध गराउनेछ।
आयोगका अनुसार मतदाता विवरण हार्डड्राइभ वा पेनड्राइभमार्फत उपलब्ध गराइनेछ। यदि एउटा प्रदेशको मात्र विवरण आवश्यक परेमा पाँच हजार रुपैयाँ तिरेर लिन सकिने व्यवस्था गरिएको छ। निर्वाचन अधिकृतले कुनै मतदाता, दलका प्रतिनिधि वा उम्मेदवारले मतदाता नामावली हेर्न वा आफ्नै खर्चमा सार्न चाहेमा नामावली नच्यातिने, नबिगारिने र नकेरमेट गरिने गरी हेर्न वा सार्न दिनुपर्ने व्यवस्था पनि गरिएको छ।
फोटोसहितको मतदाता नामावली सम्बन्धित मतदाताले मात्र हेर्न सक्ने र फोटोबिनाको मतदाता नामावली भने जोसुकैले हेर्न सक्ने व्यवस्था रहेको जानकारी मतदाता, दल तथा उम्मेदवारलाई दिनुपर्ने आयोगले जनाएको छ।
कुनै मतदाताले आफ्नो मात्र मतदाता नामावली लिन चाहेमा निर्वाचन कार्यालयले १० हजार रुपैयाँ शुल्क लिएर सो मतदाताको विवरण मात्र समेटिएको प्रतिलिपि उपलब्ध गराउनुपर्नेछ।
यस्तै, आयोगमा दर्ता भएका राजनीतिक दललाई दलको पत्रको आधारमा तथा स्वतन्त्र उम्मेदवारलाई निजको निवेदनका आधारमा निर्वाचन कार्यालयले जिल्लाभरको मतदाता नामावलीका लागि तीन हजार र निर्वाचनको कुनै एक निर्वाचन क्षेत्रको मतदाता नामावलीका लागि तीन हजार रुपैयाँ दस्तुर लिएर जन्ममिति, नागरिकता नम्बर र मोबाइल नम्बरबाहेकको विवरण विद्युतीय रूपमा उपलब्ध गराउनुपर्ने व्यवस्था गरिएको छ।
त्यस्तो विवरण उपलब्ध गराउँदा मतदाताको जन्ममिति, मोबाइल नम्बर र नागरिकताको विवरण भने समावेश गरिने छैन।
