सुर्खेत । कर्णाली प्रदेशका नवनियुक्त मुख्यमन्त्री जीवनबहादुर शाहीले आज विश्वासको मत लिँदै छन् । दिउँसो १ बजे बस्ने प्रदेशसभाको बैठकमा उनले विश्वासको मत लिन लागेका हुन् ।
मुख्यमन्त्री शाहीले मंगलबारको प्रदेश सभाको बैठकमा विश्वासको मत लिनका लागि प्रस्ताव पेश गरेका थिए ।
मुख्यमन्त्रीमा नियुक्त भएको ३० दिन भित्र विश्वासको मत लिइ सक्नुपर्ने संवैधानिक व्यवस्था रहेको छ । मुख्यमन्त्री शाही तीन दलीय गठबन्धनको समर्थनमा कात्तिक १६ गते मुख्यमन्त्रीमा नियुक्त भएका थिए ।
मंगलबारको बैठकमा प्रमुख प्रतिपक्ष दल एमाले अधिवेशनका कारण सहभागि नभए पछि विषय सूचि प्रवेश गरेर आजको लागि बैठक स्थगित भएको थियो । आजको बैठकमा एमालेका प्रदेशसभा सदस्यहरु उपस्थित हुनेछन् ।
नेपाली कांग्रेससहित नेकपा माओवादी केन्द्र र नेकपा (एकीकृत समाजवादी) को गठबन्धनमा शाहीको नेतृत्वमा सरकार बनेको छ । मुख्यमन्त्रीलाई विश्वासको मत पाउन १८ जना प्रदेशसभा सदस्य भए पुग्छ । तर उनलाई २१ जना प्रदेशसभा सदस्यको समर्थन रहेको छ । कर्णाली प्रदेशसभामा ३५ जना प्रदेशसभा सदस्य रहेका छन् । त्यस मध्य एमालेका १३, माओवादी केन्द्रका १२, नेपाली कांग्रेसका छ र समाजवादीका तीन जना प्रदेश सभा सदस्य रहेका छन् । राप्रपाका एक जना प्रदेशसभा सदस्य रहेका छन् ।
