सुर्खेत । कर्णाली प्रदेश अस्पताले आँखा रोगको उपचार गर्न शुरु गरेको छ । प्रदेश अस्पतालमा आइतबार (आज) देखि आँखा उपचार आँखा रोगको विभाग सुरुवात गरेर सेवा सुरु गरिएको हो । योसँगै अब सामान्य आँखा उपचारका लागि बिरामीलाई बाहिर पठाउनुपर्ने बाध्यता हटेको छ ।
अस्पतालका निर्देशक डा. डम्मर खड्काले बिरामीहरुको आँखाको उपचारका लागि छुट्टै बाहिर पठाउनुपर्ने बाध्यता रहे पनि अबदेखि समान्य उपचार यही गर्न सकिने बताएका छन् । अहिले कर्णाली प्रदेशको राजधानी समेत रहेको सुर्खेतमा सुर्खेत आँखा अस्पतालले मात्र आँखाको उपचार गर्दै आएको छ ।
डा. खड्काका अनुसार चोटपकट लागेर आउने बिरामीलाई आँखाको उपचार सेवा दिनुपर्ने भएमा बाहिर रिफर गरेर पठाउनुपर्नेमा अब सामान्य उपचारका लागी बाहिर पठाउनु नपर्ने भएको छ । उनले यही आर्थिक वर्षमा आँखाको शल्यक्रिया सेवा पनि सुरु गरिने बताएका छन् ।
प्रदेश अस्पतालका अनुसार हाल आँखा रोग विभागमा उपचार सेवाका लागि दुई जना आँखारोग विशेषज्ञ डाक्टर सहित तीन जनाको टिम रहेका छन् ।
