काठमाडौं । कमल थापाले राष्ट्रिय प्रजातन्त्र पार्टी (राप्रपा) बाट आफु अलग भएको घोषणा गरेका छन् । मंसिरमा भएको राप्रपाको महाधिवेशनमा राजेन्द्र लिंदेनसग पराजित उनी पूर्वराजा र निर्मल निवासले हस्तक्षेप गरेको र यसै कारण असन्तुष्ट थिए ।
थापाले पूर्वराजा र निर्मल निवासले हस्तक्षेप गरेको छानबिन गरी हस्तक्षेपको भत्र्सना गर्नुपर्ने र भविष्यमा हस्तक्षेप नहुने सुनिश्चित गर्नुपर्ने पूर्वअध्यक्ष थापाको माग थियो । उनले स्थानीय तहको निर्वाचन घोषणा अघि नै आफ्नो माग सम्बोधन हुनुपर्ने अडानमा थिए भने सोमबार मात्र आफ्नो पक्षका नेताहरुको भेला गरेर गृहनगर हेटौंडा पुगेका पूर्वअध्यक्ष थापाले मंगलबार पार्टी परित्याग गरेको घोषणा गरेका छन् ।
राप्रपा अध्यक्ष लिंदेन र थापा बिच शनिबार मात्र भेटघाट भएर यस विषयमा छलफल भएको थियो । थापाले उठाउँदै आएको मागबारे छलफल भइरहेको र छिट्टै यस बिषयमा निकास निस्कने लिंदेलले बताएका थिए ।
थापाले पार्टीसँगको ३१ वर्ष लामो सम्बन्ध आजबाट सकिएको र आफु राप्रपाबाट अलग भएको बताएका छन् । पार्टीभित्र सैद्धान्तिक विचलन र गलत प्रवृत्ति हाबी भएको त्यसलाई सुधार गरेर जाने आफ्नो चाहनाको सुनुवाइ नभएकाले अलग भएको बताएका छन् ।
कमल थापाद्वारा जारी विज्ञप्ति
