काठमाडौं । ग्रीन भेन्चर्स लिमिटेडका आईपिओ बाँडफाँट हुने मिति तय भएको छ । ग्रीन भेन्चर्स लिमिटेडले सर्वसाधारणको लागि निष्काशन गरेको साधारण शेयर (आईपिओ) आइतबार बाँडफाँट हुने भएको हो ।
कम्पनीले गत मंगलबार प्रि–अलटमेन्ट सम्पन्न गरेर सकेकोे थियो । क्यापिटलको कार्यालय नयाँ बानेश्वरमा चैत २० गते आइतबार बिहान ८ः३० बजे शेयर बाँडफाँट हुने कम्पनीको शेयर निष्काशन तथा बिक्री प्रबन्धक लक्ष्मी क्यापिटले जानकारी दिएको छ ।
कम्पनीले जारी गरेको उक्त आईपीओमा पछिल्लो तथ्यांक अनुसार २१ लाख ५७ हजार ५ सय ६० जना आवेदकबाट २ अर्ब ५९ करोड ४० लाख ५६ हजार रुपैयाँ बराबरको २ करोड ५९ लाख ४० हजार ५ सय ६० कित्ता शेयर माग गरेको थियो ।
जुन सर्वसाधरणलाई छुट्टाएको २८ लाख ७५ हजार कित्ताको ९ दशमलव ०३ गुणा बढी हुन आउछ । यसर्थ कम्पनीको शेयरमा माग भन्दा बढी आवेदन परेकोले न्यूनतम १० कित्ताको दरले वितरण हुर्नेछ ।
सोहि अनुरुप दुई लाख ८७ हजार ५ सय जना भाग्यमानी आवेदकले मात्रै १० कित्ताका दरले शेयर पाउनेछन् । मंगलबार अर्थात चैत ८ गतेदेखि कम्पनीले ३१ करोड २५ लाख रुपैयाँ बराबरको ३१ लाख २५ हजार कित्ता शेयर निष्काशनमा ल्याएको थियो ।
जसमध्ये ३ प्रतिशत अर्थात ९३ हजार ७ सय ५० कित्ता शेयर कर्मचारीहरुका लागि र ५ प्रतिशत अर्थात एक लाख ५६ हजार २ सय ५० कित्ता शेयर सामूहिक लगानी कोष छुट्याएको थियो भने बाँकी रहने २८ लाख ७५ हजार कित्ता शेयर मात्रै सर्वसाधारणलाई वितरण हुने भएको छ । हाल कम्पनीको चुक्ता पूँजी २ अर्ब ५० करोड लाख रुपैयाँ रहेको छ ।
