काठमाडौं । पेट्रोलियम पदार्थ ढुवानी व्यवसायीको आन्दोलन स्थगित भएको छ । आफ्ना मागहरुलाई सम्बोधन गरी पूरा गर्न नेपाल आयल निगम सहमत भएपछि ढुवानी व्यवसायीले आन्दोलनका सबै कार्यक्रम स्थगित गरेका हुन् ।
नेपाल पेट्रोलियम डिलर्स राष्ट्रिय एशोसिएसन, नेपाल एलपी ग्याँस उद्योग संघ र नेपाल पेट्रोलियम पदार्थ ढुवानी व्यवसायी महासंघले बिभिन्न मागहरु राखेर आन्दोलन गरेका थिए । उनीहरुको आन्दोलनका कारण पेट्रोलियम पदार्थको अभाव हुन सक्ने भन्दै शुक्रबार र शनिबार काठमाडौंका पेट्रोल पम्पहरुमा उपभोक्ताको लामो लाइन लागेको थियो ।
व्यवसायीले राखेका मागहरु मध्ये पेट्रोलियम बिक्रेता कमिसन सम्बन्धी र एलपी ग्यासको ढुवानी भाडा समायोजनको बारेमा सात दिन भित्र उचित निष्कर्ष निकाल्ने सहमति भएको छ भने अन्य मागहरु आउदो जेठ १५ सम्ममा पूरा गर्ने गरी काम गर्ने सहमति भएको छ । अब नेपाल पेट्रोलियम डिलर्स राष्ट्रिय एशोसिएसन, नेपाल एलपी ग्याँस उद्योग संघ र नेपाल पेट्रोलियम पदार्थ ढुवानी व्यवसायी महासंघले पेट्रोलियम पदार्थ र एलपी ग्याँसको ढुवानी र बिक्री वितरण सञ्चालन नरोक्ने भएका छन् ।
आन्दोलनका सबै कार्यक्रम फिर्ता गरिएको संयुक्त प्रेस विज्ञप्ति जारी गरीएको हो । प्रेस विज्ञप्तिमा नेपाल पेट्रोलियम व्यवसाय संस्थागत समन्वय समितिका प्रवक्ता विश्व अर्याल र नेपाल आयल निगमका तर्फबाट प्रवक्ता विनितमणि उपाध्यायले हस्ताक्षर गरेका छन् ।
नेपाल आयल निगम र राष्ट्रिय पेट्रोलियम व्यवसाय संस्थागत समन्वय समितिबीच शनिबार भएको वार्तामा सहमति भएपछि व्यवसायी र नेपाल आयल निगमले चार बुँदे संयुक्त विज्ञप्ति जारी गरेका हुन् ।
