काठमाडौं । प्रधानमन्त्री तीन दिने भ्रमणका लागि भारत प्रस्थान गरेका छन् । प्रधानमन्त्री शेरबहादुर देउवा चार मन्त्रीसहित तीन दिने औपचारिक भ्रमणका लागि भारतको नयाँ दिल्ली प्रस्थान गरेका हुन् । चार मन्त्रीसहित नेपाली प्रतिनिधिमण्डलको नेतृत्व गर्दै प्रधानमन्त्री देउवा केहीबेर अघि दिल्ली प्रस्थान गरेका हुन् ।
प्रधानमन्त्री प्रस्थान गर्नुअघि त्रिभुवन अन्तर्राष्ट्रिय विमानस्थलमा सभामुख अग्नि सापकोटा, गृहमन्त्री बालकृष्ण खाँण सहित नेपाली सेनाको टोली सहितले सम्मानका साथ विदाई गरेको थिए ।
प्रधानमन्त्री देउवाले शनिबार समकक्षी नरेन्द्र मोदीसँग भेटवार्ता गर्ने कार्यक्रम छ । प्रधानमन्त्री देउवाले आइतबार बनारसको भ्रमण गर्ने र सोही दिन स्वदेश फर्किने कार्यक्रम छ ।
प्रधानमन्त्री देउवा भारतीय समय अनुसार दिउँसो २ः५० बजे नयाँदिल्ली स्थित इन्दिरा गान्धी अन्तर्राष्ट्रिय विमानस्थलमा अवतरण गरेर चाणक्यपुरी स्थित आईटीसी मौर्य होटलमा बस्ने कार्यतालिका छ । त्यस्तै प्रधानमन्त्री देउवासँग आज अपराह्न साढे चार बजे भारतीय विदेशमन्त्री एस जयशंकर र सुरक्षा सल्लाहकार अजित डोभालले भेट गर्ने कार्यक्रम छ ।
त्यसपछि देउवा पाँच बजे सत्तारुढ भारतीय जनता पार्टी (भाजपा)को केन्द्रीय कार्यालयमा जाने कार्यतालिका रहृको छ । त्यसपछि उनी नयाँदिल्लीस्थित नेपाली दूतावासले आयोजना गरेको रात्रिभोजमा सहभागी हुनेछन् ।
