काठमाडौं । नेपाल सहित १४ सांसद विरुद्धको रिट माथि सुनुवाई हुदै छ । एकीकृत समाजवादीका अध्यक्ष माधव कुमार नेपाल सहित १४ जना सांसद विरुद्ध एमाले अध्यक्ष केपी शर्मा ओलीले दर्ता गरेको रिट निवेदन माथि सर्वोच्च अदालतमा (आज) आइतबार देखि सुनुवाइ हुदैछ ।
एमालेले अध्यक्ष नेपाल सहित १४ जना सांसदहरुलाई दलबाट कारवाही गरेको तर सभामुख अग्निप्रसाद सापकोटाले कारवाहीको सूचना जारी नगरेको भन्दै ओलीले सर्वोच्च अदालतमा रिट दर्ता गराएका थिए । एमालेले लामो समय देखी यहि कुरामा प्रतिनिधिसभाको बैठक वहिष्कार सहित अवरुद्ध गर्दै आएको छ ।
एमालेले नेकपा (एकीकृत समाजवादी) दल दर्ता नै गलत प्रक्रियाबाट गरेको भन्दै निर्वाचन आयोग विरुद्ध समेत मुद्दा हालेको छ । साथै झलनाथ खनाल बाहेकका १४ सांसदलाई कारवाहीको पत्र पठाएकोमा त्यसबारे सभामुखबाट कुनै निर्णय नगरी निर्वाचन आयोगले जबर्जस्ती अर्को दल दर्ता गरेको आरोप पनि लगाएको छ ।
यी दुई विवाद जोडिएका मुद्दामा यस अघि नै सर्वोच्च अदालतबाट प्रधानन्यायाधीश चोलेन्द्रशम्सेर जबरा र न्यायाधीश डा. कुमार चुडालको छुट्टाछुट्टै इजलासले अन्तरिम आदेश दिएको थिएन ।
