चितवन । भरतपुर महानगर प्रमुख पद माओवादीलाई नदिने नेपाली कांग्रेसले निर्णय गरेको छ । भरतपुर महानगरपालिकाको प्रमुख पदमा कांग्रेसको उम्मेदवार रहने गरी गठबन्धनका दलहरुबीच चुनावी तालमेल गरिने नेपाली कांग्रेस चितवनले निर्णय गरेको हो ।
आज बसेको जिल्ला कार्य समितिको बैठकले आगामी वैशाख ३० गते हुने स्थानीय तहको निर्वाचनमा महानगर प्रमुखमा कांग्रेसको उम्मेदवार रहने गरी सात वटै पालिकामा चुनावी तालमेल गर्ने निर्णय गरेको हो । बैठक नेपाली कांग्रेस चितवनको पार्टी कार्यालय कमल नगरमा बसेको थियो ।
नेपाली कांग्रेस चितवनका सभापति राजेश्वर खनालका चनुसार महानगरको प्रमुख पदमा कांग्रेसकै उम्मेदवार रहने गरी तालमेल गर्ने निर्णय भएको हो । महानगर प्रमुखको उम्मेदवारमा दाबी गर्दै आएको गठबन्धनको अर्को दल नेकपा (माओवादी केन्द्र) लाई कांग्रेसले नदिने भएको छ ।
हाल महानगरको मेयरमा माओवादी केन्द्रको तर्फबाट अध्यक्ष प्रचण्ड पुत्री रेणु दाहाल मेयर पदमा छिन् भने प्रचण्ड उनैलाई पुन मेयरमा उठाउने तयारीका साथ दावी एक कार्यक्रममा चितवन पुगेर आफ्नो पाटिले पाउनु पर्ने भन्दै दावी गरेका थिए ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले महानगरको प्रमुखमा आफ्नो पार्टीको उम्मेदवारलाई सहयोग गर्ने गरी केन्द्रीय स्तरबाटै चुनावी तालमेल गराउने कसरतमा लागेका छन् । उता कांग्रेसको केन्द्रीय समितिले पनि स्थानीय आवश्यकता अनुसार तालमेल गर्ने निर्णय यस अघि गरिसकेको छ ।
चितवन कांग्रेस यस पटक कुनै पनि हालतमा महानगर प्रमुख माओवादीलाई नदिने पक्षमा छ । अन्य पालिकामा माओवादीसँग तालमेल गर्न तयार भए पनि महानगर प्रमुखको उम्मेदवारमा कांग्रेसले नछाड्ने निर्णय नै गरेको हो ।
