पर्यटक बढाउन भारतीय मिडियामा बजेट खर्चिने कोशी प्रदेश सरकारको तयारी

कोशी प्रदेश सरकारले छिमेकी मुलुक भारतबाट नेपाल आउने पर्यटकको संख्या बढाउन भारतीय मिडियामा प्रचार-प्रसार सामग्री उपलब्ध गराउने तयारी गरेको छ । हिजो पर्यटन, वन तथा वातावरण मन्त्रालयमा आयोजित प्रदेश सरकार, पर्यटन व्यावसायी र सरोकारवालाहरूबीच भएको नीति तथा अन्तरक्रिया कार्यक्रममा पर्यटन प्रवर्द्धनका लागि यस्तो उपाय गरेको मुख्यमन्त्री केदार कार्कीले बताउनुभएको हो । भारतको बिहार, बंगालका मिडियाहरूमा कोसी प्रदेशको पर्यटकीय स्थानका बारेमा प्रचारप्रसार गर्न बजेट दिइने कार्कीले बताउनुभयो । प्रदेशका मिडियालाई प्रदेशको पर्यटन प्रवर्द्धनका लागि बजेट उपलब्ध गराइने गरेको बताउँदै मुख्यमन्त्री कार्कीले अब भारतका मिडियामा पनि केही रकम खर्चिने तयारीमा आफूहरू रहेको जाकारी दिनुभएको हो । प्रदेश सरकारले चालू आर्थिक वर्षमा पर्यटन प्रवर्द्धन गर्न एक करोड ५९ लाख रुपैयाँ बजेट विनियोजन गरेको छ । त्यसमध्ये केही रकम भारतीय मिडियाहरूमा खर्चिएर प्रदेशभित्रका पर्यटकीय स्थानहरूको प्रचारप्रसार गर्ने तयारीमा रहेको मुख्यमन्त्री कार्कीले बताउनुभएको हो ।
प्रदेश सरकारले धेरैभन्दा धेरै पर्यटक भित्र्याउन नीतिगत रूपमा व्यवस्था गर्नुपर्ने र पर्यटकीय क्षेत्रसम्म पुग्न बाटो,बिजुली,पुल जस्ता पूर्वाधारको विकासमा जोड दिनुपर्नेमा उनीहरूको एकमत थियो । साथै, उनीहरूले पर्यटन,वन तथा वातावरण मन्त्री उप्रेती र मुख्यमन्त्री कार्कीबाट प्रदेशको पर्यटकीय अवस्था कायापलट हुन सक्नेमा आफूहरू विश्वस्त रहेको सुनाए ।