काठमाडाैं । गायक योगेश्वर अमात्यको बारास्थित जग्गाको नक्कली लालपुर्जा बनाएर बैंकबाट १९ करोड रुपैयाँ झिकेको खुलासा भएको छ। गायक अमात्यको १२ बिघा जग्गाको नक्कली धनीपुर्जा धितो राखी कुमारी बैंकको बारा शाखाबाट १९ करोड रुपैयाँ ऋण निकालेको पत्ता लागेको हो। आफ्नो जग्गाको कीर्ते लालपुर्जा बनाएर ऋण निकालेको थाहा भएपछि गायक अमात्यले दिएको उजुरीका आधारमा प्रहरीको केन्द्रीय अनुसन्धान ब्युरो (सीआईबी) ले अनुसन्धान गर्दा तथ्य खुलेको हो।
घटनामा संलग्न आरोपमा सीआईबीले ५ जनालाई पक्राउ गरेको छ। सीआईबीका प्रमुख प्रहरी नायब महानिरीक्षक (डीआईजी) धीरजप्रताप सिंहका अनुसार सरकारी लिखत कीर्तेसम्बन्धी कसुरमा अनुसन्धानका लागि कुमारी बैंक बारा शाखाका ऋण अधिकृत सोनु ठाकुर, मूल्यांकनकर्ता राजेश चौरसिया, नक्कली लालपुर्जा बनाएर पेस गर्ने काठमाडौंका एसके महर्जन, मुक्तिलाल गौतम र अर्का बिचौलिया कुसुम प्रधानलाई नियन्त्रणमा लिइएको हो।
कोटेश्वरस्थित बेनियल ट्रेडिङ कम्पनीका सञ्चालक गौतम र महर्जनले बिरुवा भूमि वनकाली कम्पनीका नाममा नक्कली कागजात बनाएर काठमाडौंको न्युरोडस्थित कुमारी बैंकको शाखाबाट १९ करोड रुपैयाँ ऋण झिकेको पत्ता लागेको हो।
ऋण स्वीकृत गर्न नक्सालस्थित कुमारी बैंकको केन्द्रीय कार्यालयलाई पत्राचार गरिएको पाइएको छ। केन्द्रीय बैंकले अनुमति दिएपछि न्युरोडस्थित शाखाबाट रकम निकालिएको पाइएको सीआईबीले जनाएको छ। उक्त कीर्तेबारे विस्तृत अनुसन्धान जारी रहेको प्रहरीले जनाएको छ।
