पुल निर्माण पुरा गरेर राजधानी फर्के कान्छाराम

रामेछाप । पुल बगाएको स्थानमा बेलिब्रीज निर्माण पुरा गरेपछि नेपाल सरकारका उर्जा जलश्रोत तथा सिंचाई राज्य मन्त्री पूर्णवहादुर तामाङ ( कान्छाराम ) काठमाण्डौं फर्किएका छन।
असोजको १२ गते आएको बाढीले सुनकोशी नदीमा रहेको खुर्कोट स्थित मोटरेबल पुलको २ स्पान मध्ये १ स्पान बगाएको थियो । पुल बगेपछि रामेछाप राजधानी र तराई संगको सम्पर्कबाट विच्छेद वनेको थियो । पुल बगेपछि बैकल्पिक सडकको रुपमा सित्खाको सडक भएर काठमाण्डौं र तराई जान बाध्य रामेछापेलीले अव मंगलबार देखि सहज यात्रा गर्न पाउने भएका छन् ।
जिल्लाको लाईभलाईनको रुपमा रहेको उक्त पुल बगेपछिनै नेपाल सरकारबाट उक्त स्थानमा बेलिब्रीज राख्ने, बेलिब्रीजको निर्माण गर्ने जिम्मा नेपाली सेनालाई दिने सरकारको निर्णय गराउन देखि आफै खटेर सामाग्रीको व्यवस्थापन गरेर खुर्कोट आएका राज्य मन्त्री तामाङ आईतबार पुल निर्माण पुरा भएपछि काठमाण्डौं फर्केका हुन् । उनले खुर्कोटको बेलिब्रीज तयार नभए सम्म काठमाण्डौं नफर्कने वताएका थिए ।
खुर्कोटमा रहेको सुनकोशी नदीको पुल राख्ने रामेछाप तर्फको जग आसपासको निर्माण कार्यमा राज्य मन्त्री आफैले श्रम गरेका थिए । श्रममा मन्थली नगरपालिकाका प्रमुख लव श्रेष्ठ र अन्य जनप्रतिनिधि समेत सम्लग्न थिए । पुल निर्माणका लागि कुनै पनि कुराको कमी हुन नदिन राज्यमन्त्री तामाङले नेपाली सेना संग आवश्यक समन्वय गरेका थिए । दशैंको टीका लगाएपछि दोश्रो दिन उनी खुर्कोटको पुल निर्माणलाई तिव्रता दिन निर्माण स्थलमा पुगेका थिए ।
झण्डै ५३ मिटर लामो उक्त पुल नेपाली सेनाका प्रमुख सेनानी नारायण तुम्बाहम्फेको नेतृत्वमा रहेको प्राविधिकको टोलिले जडान गरेको हो । पुल जडान कार्य आईतबार सकिएको भएपनि मंगलबारबाट मात्र यातायात संचालन गर्ने तयारी भएको छ ।
यसैविच मन्थली नगरपालिकाले मंगलबार मध्यान्ह सुनकोशीको खुर्कोट पुलमा निर्माण कार्यमा सम्लग्न सवै पक्षलाई धन्यवाद दिने कार्यक्रम राखेको नगर प्रम्ुख लब श्रेष्ठले जनाएका छन् ।