काठमाडौँ: ललितपुरको महालक्ष्मी नगरपालिका–४ ओचु हाइटस्थित एक मन्दिर अगाडि बुधबार राति ३० वर्षीय पुरुषको खुकुरी प्रहारबाट हत्या भएको छ।
रामेछाप घर भई ओचुहाइट बस्ने रिपक खातीको खुकुरी प्रहारबाट हत्या भएको हो। उनको हत्या आरोपमा प्रहरीले सोही ठाउँ बस्ने उनकै साथी २५ वर्षीय सुमन रसाइलीलाई पक्राउ गरेको छ।
रिपक खातीले आफ्नो अन्दाजी १५ वर्षीया बहिनीलाई बारम्बार जिस्क्याएकोले हत्या गरेको रसाइलीले प्रारम्भिक बयानमा बताएका छन्।
आफूलाई फेरि जिस्क्याएको भनेर बहिनीले बुधबार सुनाएपछि त्यसपछि उनले खातीलाई राति नै मन्दिरमा बोलाएका थिए। मन्दिरमा आएपछि उनीमाथि सुमनले खुकुरी प्रहार गरी हत्या गरेको जिल्ला प्रहरी परिसर ललितपुरका एसएसपी श्यामकृष्ण अधिकारीले बताए।
मृतकको शव पोस्टमार्टमका लागि पाटन अस्पताल पठाइएको र घटना बारे थप अनुसन्धान भैरहेको एसएसपी अधिकारीले जानकारी दिए।
