रामेछाप, जेठ २८ — रामेछाप नगरपालिका–१ औपचारिक रूपमा बालमैत्री वडा घोषणा गरिएको छ। मंगलबार सम्पन्न विशेष कार्यक्रममार्फत बाल अधिकार र सुरक्षाको प्रवर्द्धन गर्दै यस वडालाई बालमैत्री क्षेत्रको रूपमा घोषणा गरिएको हो।
कार्यक्रम कार्यबाहक वडा अध्यक्ष सन्जिव कार्कीको अध्यक्षता र रामेछाप नगरपालिकाकी निर्वतमान उपप्रमुख शृजना खड्काको प्रमुख आतिथ्यमा सम्पन्न भएको थियो। कार्यक्रममा वडा भित्रका शिक्षक, विद्यार्थी, आमा समूह, महिला समूह, स्वयंसेविका लगायत ५ सयभन्दा बढी व्यक्तिको सक्रिय सहभागिता रहेको थियो। रामेछाप नगरपालिका बाट कानुनी सल्लाहकार लोकहरि दाहल,शाखा प्रमुख नबराज बढु र रोजगार शाखा बाट प्रमिला सापकोटाको समेत प्रतिनिधित्व रहेको थियो।
घोषणासँगै प्रमुख अतिथि शृजना खड्काले बालमैत्री सुचकहरू पूरा गर्नु एक महत्वपूर्ण उपलब्धि भए पनि यसलाई अन्तिम गन्तव्य नभई सुरुआतको रूपमा लिनुपर्ने बताइन्। उनले भनिन्, “सुचक पूरा गरेर घोषणा गर्नु मात्र पुग्दैन, अब कार्यान्वयनमा सरकार, अभिभावक, शिक्षक र सम्पूर्ण समाज कठोर प्रतिबद्धताका साथ लाग्नुपर्छ।”
कार्यक्रम समापन गर्दै कार्यबाहक अध्यक्ष कार्कीले वडा भित्रका सबै सरोकारवालाको सक्रिय सहयोगले बालमैत्री सुचकहरू पूरा गर्न सम्भव भएको उल्लेख गर्दै भविष्यमा पनि निरन्तर प्रयास जारी रहने प्रतिबद्धता व्यक्त गरे। उनले कार्यक्रममा उपस्थिति सबैलाई धन्यवाद दिँदै स्थानीय तहको भूमिकालाई अझ प्रभावकारी बनाउने प्रतिवद्धता समेत दोहोर्याए।
बालमैत्री वडा घोषणाले अबदेखि बालबालिकाका अधिकार, संरक्षण, शिक्षा, स्वास्थ्य र सहभागितासम्बन्धी मापदण्डलाई प्राथमिकतामा राखेर नीति तथा कार्यक्रम लागू गरिने अपेक्षा गरिएको छ।
