जनकपुरधाम, २८ जेठ
सन्त कवीर जयन्तीको अवसरमा जनकपुरधाममा १५ नवजोडीको सामूहिक रूपमा दाइजोमुक्त विवाह सम्पन्न गरिएको छ। विवाहमा सहभागीमध्ये नौ जोडी नेपालका र छ जोडी भारतका रहेका छन्।
६२८औँ कवीर प्रकट दिवसको उपलक्ष्यमा मिथिला नगरपालिका–२ वेलाचापीस्थित सतलोक आश्रममा आयोजित तीनदिने समारोहको प्रमुख आकर्षण दाइजोविहीन विवाह कार्यक्रम रह्यो। वैदिक विधिअनुसार १७ मिनेटमै विवाह कार्यक्रम सम्पन्न गरिएको थियो।
दाइजो प्रथा गहिरो रूपमा जरा गाडेको मधेस प्रदेशमा यस्तो विवाह कार्यक्रमले सामाजिक चेतना र सकारात्मक सन्देश प्रवाह गरेको सतलोक आश्रमका असुर निकन्द रमैणीले बताए। विवाहमा सहभागी नवविवाहित जोडीहरू र उनीहरूका अभिभावकले पनि यस्तो उदाहरणीय पहलले समाजमा परिवर्तन ल्याउने विश्वास व्यक्त गरे।
समारोहमा सामाजिक, धार्मिक तथा सेवामूलक गतिविधिहरूअन्तर्गत विशाल भण्डारा, रक्तदान, निःशुल्क भोजन सेवा लगायतका कार्यक्रमहरू सञ्चालन गरिएको थियो।
पर्सा जिल्लाको वहुदरमाई नगरपालिकाकी उपप्रमुख सुष्माकुमारी कुशवाहाले समाज सुधारका यस्ता कार्यक्रम सतलोक आश्रमले आगामी दिनमा अझै व्यापक रूपमा सञ्चालन गर्नुपर्ने आवश्यकता औंल्याइन्।
सन्त कवीरको योगदानलाई सम्मान गर्दै मधेस प्रदेश सरकारले उक्त दिन सार्वजनिक बिदा समेत दिएको छ।
