मन्थली, रामेछाप
मन्थली अस्पतालमा कार्यरत फार्मेसी कर्मचारी बिमल सुबेदीमाथि बिरामी तथा कुरुवामाथि गालीगलौज र अभद्र व्यवहार गरेको गम्भीर आरोप लागेको छ।
खाँडादेबी गाउँपालिकाबाट आएका एक बिरामी औषधि लिन फार्मेसी पुगेका थिए। उनले चिकित्सकले लेखिदिएको पर्ची देखाएर औषधि माग्दा सुबेदीले तिक्त व्यवहार गर्दै, “यो औषधि छैन, पाँच वर्षदेखि छैन,” भनेर झर्किएको बिरामीले बताएका छन्। “मैले ‘किन छैन?’ भनेर सोध्दा, अझै चिच्याउँदै गाली गरे,” ती बिरामीले नाम नखुलाउने शर्तमा दुःख व्यक्त गरे।
फार्मेसीमै कार्यरत सुबेदीले वार्डसम्म आउने बिरामीका कुरुवासँग समेत दुर्व्यवहार गर्ने गरेको आरोप पनि लागेको छ। अस्पताल प्रशासनले समेत यसबारे गुनासोहरू पहिल्यैदेखि आउने गरेको स्वीकारेको छ।
“उहाँ (सुबेदी) विरुद्ध यसअघि पनि गुनासो आएको थियो। विभागीय कारबाहीको प्रक्रिया अघि बढाउने तयारीमा छौं,” अस्पतालका मेडिकल सुपरिन्टेन्डेन्ट डा. केशव धामीले जानकारी दिए। फार्मेसी कर्मचारीको कक्ष अस्पतालको मूल भवनमा छ तर व्यवस्थापनमा समस्या भएको डा. धामीले स्वीकारे।
त्यसैगरी, फार्मेसीबाट दिइने औषधि र त्यसको गुणस्तरसम्बन्धी प्रश्नहरू पनि उठ्न थालेका छन्। एक सेवाग्राहीले नाम नखुलाउने शर्तमा भने, “फार्मेसीबाट दिइने औषधि कुन आधारमा प्रयोग गर्ने भन्ने अन्योल हुन्छ। निजी भवनमा राखिएको फार्मेसीबाट औषधि लिँदा डर लाग्छ।”
कर्मचारी सुबेदी मन्थली–१, सानिमदौका स्थानीय हुन्। अस्पतालकै एक कर्मचारीले सुबेदीको व्यवहारप्रति गम्भीर चिन्ता व्यक्त गर्दै भने, “राजनीतिक पहुँच र व्यक्तिगत दम्भका कारण उहाँले खुलेर दादागिरी देखाइरहनुभएको छ। अस्पतालजस्तो संवेदनशील ठाउँमा यस्तो प्रवृत्ति सह्य हुँदैन।”
यो बिषयमा हामी गम्भीर भएको मन्थली नगरपालिकाका स्वास्थ्य शाखा प्रमुख केशाब फुयालले जनाएका छन। बदलाको भावाना बोक्ने जोकोहीलाई पनि कानुनी दायरामा नगरले ल्याउछ कराररका कर्मचारीलाई नगरले उपयुक्त नलागे करार भंग गर्ने अधिकार स्वयं नगरलाई छ हामी यस्ता कर्मचारी सदैव लिएर हिड्न नसक्ने समेत उल्लेख गरेका छन।
सुवेदी भन्छन “मैले पनि फार्मेसी पास गरेको छु, मास्टर गरेको छु म कसैसँग डराउने होइन।
अस्पताल प्रशासनले विभागीय कारबाही अगाडि बढाउने बताएको भए पनि यस्ता गम्भीर गुनासो समाधानमा प्रभावकारी कदम चालिएको छैन भन्ने पीडित पक्षको गुनासो छ। अस्पतालमा सेवा लिने सर्वसाधारणले असहज महसुस गर्नु परिरहेको भन्दै, तत्काल सुधारात्मक कार्यको माग गरिरहेका छन्।
