काठमाडौँ २७ असार
प्रधानमन्त्री केपी शर्मा ओलीले विकास र समृद्धिको प्रक्रियासँगै जनसङ्ख्याको सन्तुलित वृद्धिको आवश्यकता औँल्याउँदै मानव अस्तित्व नै संकटमा पर्न सक्ने बताउनुभएको छ।
विश्व जनसङ्ख्या दिवसको अवसरमा आज स्वास्थ्य तथा जनसङ्ख्या मन्त्रालयद्वारा आयोजित कार्यक्रममा बोल्दै प्रधानमन्त्री ओलीले नयाँ सार्वजनिक गरिएको राष्ट्रिय जनसङ्ख्या नीति, २०८२ को प्रसङ्गमा जनसङ्ख्या र विकासको गति समानान्तर हुनुपर्नेमा जोड दिनुभयो।
“धर्ती, देश र मानव सभ्यताको अस्तित्व मानव जातिसँगै गाँसिएको छ। जनसङ्ख्या बिना राष्ट्रको अस्तित्व हुँदैन,” उहाँले भन्नुभयो ।
“मानिस भएकाले हरेक देशको अर्थ छ, धर्तीको अर्थ छ। जनसङ्ख्या हुँदैनथ्यो भने देश हुँदैन। हामीले मानव जातिको सुखपूर्ण अस्तित्व रक्षाका लागि उपयुक्त नीति र कदमहरु चाल्नुपर्छ”, प्रधानमन्त्री ओलीले भन्नुभयो, “सृष्टिको सृजनाका लागि मानव जाति जति मूल्यवान् अर्काे छैन। आफ्नो स्वार्थका लागि मान्छे मार्ने कामधन्धा छोड्न सम्बद्ध सबैसँग अनुरोध गर्दछु। जनसङ्ख्याका बारेमा गोष्ठी र सेमिनार पनि गर्ने अनि आम विनाशका हतियार बनाएर मान्छे पनि मारिरहने क्रमले मानव संसारको अस्तित्व बच्दैन।”
प्रधानमन्त्री ओलीले २० वर्षपछि मात्र विवाह गर्न पाउने कानुनी व्यवस्था भएबमोजिम समयमै विवाह गरी ३० वर्षभित्र तीन सन्तान जन्माईसक्न र ४० कटेपछि रमाउला भन्ने गीतमा नअल्मन आग्रह गर्नुभयो।
उहाँले सन्तानले डाँडाकाँडा ढाकून् नभन भनेर जनचेतना फैलाउँदा उल्टो असर परी सन्तान नै नजन्माउने परिस्थिति सिर्जना भएकोतर्फ चिन्ता व्यक्त गर्दै विकसित देशहरूमा समेत जनसङ्ख्याको वृद्धिदर ऋणात्मक हुँदा यसले समग्र विश्व प्रभावित भइ मानव अस्तित्वमाथि नै सङ्कट आउनसक्ने चिन्ता व्यक्त गर्नुभयो।
