काठमाडौँ: बागमती प्रदेशमा नेपाली कांग्रेस संसदीय दलको नेताका लागि बहादुरसिंह लामा र इन्द्र बानियाँको उम्मेदवारी परेको छ।
मंगलबार तत्कालीन दलका नेता लामाविरुद्धको अविश्वास प्रस्ताव बहुमतले पारित भएपछि नयाँ नेतृत्व चयनका लागि आज उम्मेदवारी दर्ता भएको हो। बिहान ११ बजेसम्मको समयसीमाभित्र इन्द्र बानियाँ र बहादुरसिंह लामाले उम्मेदवारी दर्ता गराएका हुन्। उम्मेदवारी फिर्ताको समय दिउँसो १२ बजेसम्म तोकिएको थियो, तर कुनै उम्मेदवारी फिर्ता भएको छैन।
यसअघि कांग्रेस बागमती प्रदेश कार्यसम्पादन समितिले सहमहामन्त्री हरिशरण श्रेष्ठको संयोजकत्वमा निर्वाचन समिति गठन गरेको थियो। बागमती प्रदेशसभामा कांग्रेसका ३७ जना सांसद छन्।
कांग्रेस संसदीय दलको विधानअनुसार नेतामा एकभन्दा बढी उम्मेदवार रहेमा गोप्य मतदानमार्फत निर्वाचन हुने व्यवस्था छ। विजयी हुनका लागि उम्मेदवारले कुल सदस्य संख्याको ५० प्रतिशतभन्दा बढी मत प्राप्त गर्नुपर्छ।
यसैबीच, लामा पक्षले आफ्ना पक्षमा रहेका १५ सांसदमध्ये तीन जनालाई मन्त्री नियुक्त गर्ने तयारी गरेको थियो। गोविन्द लम्साल, माया श्रेष्ठ र गीता गुरुङलाई मन्त्री बनाएर शपथ गराउने तयारी भए पनि सत्तारूढ नेकपा एमालेको असहमतिको कारण उक्त प्रक्रिया रोकिएको स्रोतले जनाएको छ।
