काठमाडौँ: नेपाली बजारमा आज सुनको मूल्यले पुनः नयाँ रेकर्ड कायम गरेको छ। लगातार बढ्दै गएको सुनको मूल्य आज अहिलेसम्मकै उच्च स्तरमा पुगेको छ।
गत साउन २० गते सुन प्रतितोला एक लाख ९८ हजार पाँच सय रुपैयाँमा कारोबार भएको थियो, जुन त्यसबेला सबैभन्दा उच्च मूल्य थियो। तर आज सुनको मूल्य प्रतितोला एक लाख ९९ हजार चार सय रुपैयाँ पुगेको छ, जुन पछिल्लो रेकर्डभन्दा प्रतितोला ९ सय रुपैयाँ बढी हो।
बिहीबार सुनको मूल्य प्रतितोला एक लाख ९८ हजार चार सय रुपैयाँमा कारोबार भएको थियो भने शुक्रबार त्यसमा एक हजार रुपैयाँको वृद्धी भएको छ।
त्यसैगरी, आज चाँदीको मूल्यमा पनि वृद्धि देखिएको छ। बिहीबार चाँदी प्रतितोला दुई हजार तीन सय १५ रुपैयाँमा कारोबार भएको थियो भने शुक्रबार यसको मूल्य प्रतितोला दुई हजार तीन सय २५ रुपैयाँ पुगेको छ, जसले अघिल्लो दिनको तुलनामा प्रतितोला १० रुपैयाँको बढोत्तरी जनाउँछ।
