काठमाडौँ: प्रतिनिधि सभाको राज्य व्यवस्था तथा सुशासन समितिको सभापतिमा इस्वरीदेवी न्यौपाने निर्विरोध निर्वाचित भएकी छन्।
बुधबार बसेको समितिको बैठकमा नेपाली कांग्रेस सांसद न्यौपाने निर्विरोध सभापतिमा चयन भएको घोषणा गरिएको हो। बैठकको अध्यक्षता गरेका ज्येष्ठ सदस्य सर्वेन्द्रनाथ शुक्लाले न्यौपाने निर्विरोध निर्वाचित भएको औपचारिक घोषणा गरेका हुन्।
यसअघि संसदीय सुनुवाइ समिति सभापतिको पदबाट राजीनामा दिएर न्यौपानेले राज्य व्यवस्था समितिको सभापतिका लागि उम्मेदवारी दर्ता गरेकी थिइन्। उनको उम्मेदवारी कांग्रेस सांसद रामहरि खतिवडाले प्रस्ताव गरेका थिए भने एमाले सांसद कृष्णगोपाल श्रेष्ठले समर्थन गरेका थिए।
कुलिङ पिरियडसम्बन्धी विवादपछि खतिवडाले राजीनामा दिएपछि न्यौपाने यस पदमा निर्वाचित भएकी हुन्।
