काठमाडौँ: प्रतिनिधिसभा विघटनसँगै आगामी फागुन २१ गतेका लागि आम निर्वाचनको मिति तय भएपछि निर्वाचन आयोगले आवश्यक तयारी प्रक्रिया सुरु गरेको छ।
यसअघि कात्तिक १७ गते हुने भनिएको रूपन्देही–३ को उपनिर्वाचन रद्द भइसकेको आयोगले अब मध्यावधि निर्वाचनतर्फ ध्यान केन्द्रित गरेको छ।
आयोगका प्रवक्ता नारायणप्रसाद भट्टराईका अनुसार निर्वाचन मिति घोषणापछि सरकारसँग औपचारिक परामर्श, व्यवस्थापकीय तयारी र योजना तर्जुमा सुरु गरिएको छ। यससँगै, नवनियुक्त अर्थमन्त्री रामेश्वर खनालले निर्वाचन खर्च व्यवस्थापनका लागि बजेट परिमार्जन गर्ने घोषणा गरिसक्नुभएको छ।
भदौ २३ र २४ गतेको ‘जेनजी पुस्ता’ आन्दोलनपछि तत्कालीन प्रधानमन्त्री केपी शर्मा ओलीले पद त्याग गरेपछि राष्ट्रपति रामचन्द्र पौडेलले भदौ २७ गते पूर्वप्रधानन्यायाधीश सुशीला कार्कीलाई प्रधानमन्त्री नियुक्त गर्नुभएको थियो। सोही दिन प्रधानमन्त्रीको सिफारिसमा प्रतिनिधिसभा विघटन गरी फागुन २१ गतेका लागि निर्वाचनको मिति तोकिएको हो।
