काठमाडौँ: राष्ट्रपति रामचन्द्र पौडेलसँग राष्ट्रियसभा अध्यक्ष नारायणप्रसाद दाहालले आज शीतल निवासमा भेट गरेका छन् ।
राष्ट्रपति कार्यालयका अनुसार भेटका क्रममा अध्यक्ष दाहालले अन्तर–व्यवस्थापिका सङ्घ (आइपियु) को १५१औँ महासभामा नेपालको प्रतिनिधित्वबारे जानकारी गराएका थिए। विश्वका १८१ देशका संसद सदस्य रहेको उक्त महासभा स्विट्जरल्यान्डको जेनेभामा आगामी अक्टोबर १९ देखि २३ तारिखसम्म हुने कार्यक्रम छ।
महासभामा सहभागी हुन राष्ट्रियसभा अध्यक्ष दाहालको नेतृत्वमा सङ्घीय संसदको एक प्रतिनिधि मण्डल प्रस्थान गर्ने तयारी भइरहेको छ। यसअघि आइपियु महासभामा नेपालको सहभागिता तथा राष्ट्रियसभा निर्वाचनलगायत समसामयिक विषयमा प्रधानमन्त्री सुशीला कार्कीसँग पनि अध्यक्ष दाहालले भेटवार्ता गरेका थिए।
