काठमाडौं: नेपाली कांग्रेसको केन्द्रीय कार्यसमितिको बैठक आज पनि बस्दैछ। बिहान ११ः३० बजे बस्ने बैठकमा पार्टीको १५औँ महाधिवेशन र आगामी राजनीतिक रणनीतिबारे छलफल हुने जनाइएको छ।
कांग्रेसले करिब एक महिनादेखि महाधिवेशनको मिति निर्धारणका विषयमा निरन्तर छलफल गरिरहेको भए पनि नेताहरूबीचको फरक धारणा कारण अहिलेसम्म निष्कर्षमा पुग्न सकेको छैन।
संस्थापन पक्षका नेताहरूले आगामी निर्वाचनपछि मात्र महाधिवेशन गर्नुपर्ने धारणा राखिरहेका छन् भने संस्थापन इतर समूहले भने महाधिवेशन सम्पन्न गरेरै चुनावमा जानुपर्ने अडान लिएका छन्। पार्टीभित्र संसद् पुनर्स्थापना र पुस वा वैशाखमा महाधिवेशन गर्ने विकल्पसमेत चर्चामा रहेको बताइएको छ।
यससँगै, भदौ २७ गते सरकारले गरेको संसद् विघटनविरुद्ध दायर गरिएको रिटमाथि सर्वोच्च अदालतमा सुनुवाइ चलिरहेकै बेला कांग्रेसका केही सांसदहरूले हस्ताक्षर अभियानको तयारीसमेत तीव्र बनाएका छन्।
सभापति शेरबहादुर देउवाको नेतृत्वमा रहेको कार्यसमितिको कार्यकाल मंसिरदेखि सकिँदै जाँदा पार्टीभित्र गुट–उपगुट सक्रिय बनेका छन् र कार्यसमिति बैठकले कुनै ठोस निष्कर्ष निकाल्न नसकेको अवस्था रहेको छ।
