विराटनगर: नेकपा (एमाले) नेता महेश बस्नेतमाथि आइतबार विराटनगरमा आक्रमणको प्रयास भएको छ। सुनसरीको इटहरीमा आयोजना गरिएको कार्यक्रममा सहभागी हुन विराटनगर पुगेका बस्नेतमाथि विमानस्थल बाहिर रातो रङ छ्यापेर आक्रमण गर्ने कोशिश गरिएको हो।
बस्नेत चढेको गाडीलाई लक्षित गर्दै रङ हानिएको र त्यसपछि उनको विरोधमा नाराबाजी गरिएको प्रहरीले जनाएको छ। सुरक्षा चुनौतीका कारण बस्नेतको भ्रमण गोप्य रूपमा राखिएको थियो। विराटनगर विमानस्थलमा अवतरण भएको केहीबेरमै उनलाई नेपाल प्रहरी र सशस्त्र प्रहरीले कडा सुरक्षा घेरामा राखेर सर्वसाधारण निकासबाट स्कर्टिङ गर्दै गन्तव्यतर्फ लगिएको थियो।
तर कडा सुरक्षा प्रबन्धका बीच पनि बस्नेतमाथि आक्रमणको प्रयास भएको हो। उनी राष्ट्रिय युवा संघ नेपाल, कोसी प्रदेशद्वारा इटहरीमा आयोजित ‘जागरण सभा तथा जेनजी पुस्तासँग अन्तर–संवाद’ कार्यक्रमलाई सम्बोधन गर्न आएका थिए। उनीसँगै एमाले नेता भानुभक्त ढकाल पनि विराटनगर आएका छन्।
आक्रमणमा संलग्न रहेको आरोपमा विराटनगर–२ का १९ वर्षीय अर्पित कुँवर र विराटनगर–१ का २५ वर्षीय संजोग गौतमलाई प्रहरीले पक्राउ गरेको छ। प्रहरीका अनुसार घटनामा बस्नेत सुरक्षित छन्।
