काठमाडौँ: अन्तरिम सरकारकी प्रधानमन्त्री सुशीला कार्कीले आफ्नो सचिवालयको संरचना परिमार्जन गर्दै सदस्य संख्या घटाउनुभएको छ। प्रधानमन्त्री तथा मन्त्रिपरिषद् कार्यालयले जारी गरेको विज्ञप्तिअनुसार, २० सदस्यीय सचिवालयबाट १४ जना हटाइएपछि अब सचिवालयमा ६ जना मात्र रहनेछन्।
विज्ञप्तिमा उल्लेख भएअनुसार, ‘‘प्रधानमन्त्रीको सल्लाहकार तथा सचिवालय व्यवस्थापन कार्यविधि, २०७४ (एघारौँ संशोधन २०८१)’’ अनुसार सचिवालयमा विभिन्न पदका ६६ जनाको दरबन्दी रहे पनि आवश्यकताअनुसार मात्र २० जनाको टिम बनाएर मितव्ययी ढंगले काम हुँदै आएको थियो।
प्रधानमन्त्री कार्यालयका सहसचिव हेमराज अर्यालका अनुसार, सचिवालयमा रहने ६ जना पहिले नै नियुक्त गरिएका कर्मचारी हुन्। अब प्रधानमन्त्री कार्कीको सचिवालयमा प्रमुख स्वकीय सचिव, मुख्य सल्लाहकार, जनसम्पर्क सल्लाहकार, प्रेस संयोजक, स्वकीय शाखा अधिकृत (फोटोग्राफर) र जनस्वास्थ्य विज्ञ मात्र रहनेछन्।
