काठमाडौँ: आगामी फागुन २१ गते निर्धारित प्रतिनिधिसभा निर्वाचन नजिकिँदै जाँदा अब ९० दिन मात्रै बाँकी रहेको छ। निर्वाचन नजिकिएसँगै निर्वाचन आयोगले आवश्यक तयारीलाई तीव्र बनाएको छ भने राजनीतिक दलहरूले समेत चुनावमुखी आन्तरिक तयारीलाई गति दिएका छन्।
आयोगले शनिबारदेखि समानुपातिक निर्वाचन प्रणालीअन्तर्गतको कार्यक्रम सञ्चालन गर्ने तयारी गरेको छ। सोअनुसार मङ्सिर २१ गते बिहान १ बजेदेखि अपराह्न ४ बजेसम्म राजनीतिक दलहरूले समानुपातिकतर्फ आवेदन दिने समय तोकिएको छ। आवेदन दिने दलहरूको सूची मङ्सिर २४ गते प्रकाशित गरिनेछ।
समानुपातिकतर्फ उम्मेदवारको बन्दसूची पेस गर्ने समय पुस १३ र १४ गते बिहान १० बजेदेखि अपराह्न ४ बजेसम्म तोकिएको छ। बन्दसूचीको अन्तिम प्रकाशन माघ ३० गते हुने आयोगका प्रवक्ता नारायणप्रसाद भट्टराईले जानकारी दिनुभयो।
प्रत्यक्षतर्फका लागि माघ ६ गते उम्मेदवारको मनोनयन दर्ता हुनेछ। सोही दिन मनोनयन दर्ता भएका उम्मेदवारको प्रारम्भिक सूची पनि सार्वजनिक हुनेछ। माघ ७ गते उम्मेदवारीविरुद्ध उजुरी दिने समय तोकिएको छ। माघ ८ गते उम्मेदवारको नामावली प्रकाशित गरिनेछ।
माघ ९ गते उम्मेदवारले आफ्नो नाम फिर्ता लिन सक्नेछन्। सोही दिन अन्तिम नामावली प्रकाशित हुनुका साथै उम्मेदवारलाई निर्वाचन चिह्न प्रदान गरिने कार्यक्रम छ।
